Ish koordinatori i Kosovës për dialogun me Serbinë dhe anëtar i LDK-së, Skënder Hyseni, ka reaguar ndaj deklaratave të liderit të kësaj partie, Lumir Abdixhiku të dhëna një ditë më parë, raporton teve1.info
Përmes një statusi në Facebook, Hyseni e ka thënë se Abdixhiku po mundohet të gjej armiqtë e brendshëm në LDK.
“Ndale turrin Lumir!
Lumir Abdixhiku sërish qenka marrë me “armiqtë e brendshëm” të LDK-së.
O tempora o mores!
Në nëntor, pas një kritike që i kisha bërë politikës konfrontuese e izolacioniste të binomit Kuti-Osmani, Lumir Abdixhiku kishte lëshuar një komunikatë të tipit ekskomunikues komunist kundër meje. Kjo ishte komunikata e Lumir Abdixhikut kundër meje:
“LDK jo vetëm që distancohet nga gjuha e tij, por LDK ka dy vite që është e distancuar nga mendësia e tillë politike. Është për habi, gjithsesi, se si figura pa fuqi politike e partiake sot, zënë hapësira mediale e kontaminojnë diskursin publik”.
Shtrohet pyetja pse ndjente nevojë Lumiri t’i bashkohej korit idiotesk të qarqeve të Albinit e Vjosës kundër meje, në kohën kur unë as që i kisha ba çfarëdo reference Lumirit, e aq më pak LDK-së! Pse?!”, ka shkruar Hyseni.
Sipas Hysenit, Abdixhiku e ka përmendur edhe në një studio televizive duke thënë se nuk ka besuar se Albin Kurti dhe Skënder Hyseni do të bëhen bashkë kundër tij.
“Në një studio televizive mbrëmë, Lumiri paska thënë: “Nuk kam besuar kurrë që Albin Kurti dhe Skënder Hyseni do të bëhen bashkë kundër meje (demek kundër Lumirit) dhe LDK-së. Këtë marrëzi të Lumirit nuk do ta ‘nderoja’ me asnjë koment tjetër pos “marrëzi”. Nëse asgjë tjetër, opinioni e di fort mirë qëndrimin tim ndaj Albin Kurtit dhe VV-së dhe politikave shkatërruese të tyre.
Ashiqare Lumiri paska problem me sytë dhe me sensin e gjykimit!
Nuk ndjej nevojë unë kurrë të jem kundër Albin Kurtit si person, por jam dhe duket do të jam egërsisht dhe përjetësisht kundër politikave shkatërrimtare të Kurtit.
Aq më pak ndjej nevojë të jam kundër Lumirit. Nuk më bënë përshtypje cili është Lumiri si njeri e person! Por, por si lider i LDK-së po!”, ka shkruar.
