FIFA ka hapur një hetim zyrtar për ngjarjet në Maracana përpara ndeshjes kualifikuese të Kupës së Botës 2026 midis Brazilit dhe Argjentinës. Më konkretisht, FIFA do të hetojë sulmin e policisë braziliane ndaj tifozëve vizitorë ku u lënduan disa persona.
Kujtojmë se kombëtarja e Argjentinës mposhti Brazilin në Rio de Zhaneiro me golin e Nicolas Otamendit – por fillimi i ndeshjes u vonua me gjysmë ore për shkak të një konflikti mes tifozëve dhe policisë në tribunë. Ndërsa situata në tribuna nuk u vu nën kontroll, Leo Messi e tërhoqi ekipin në dhomën e zhveshjes dhe Emiliano Martinez u përpoq të ndalonte vetë policinë.
Skuadra vendase priti kampionët e botës me shpresën për të thyer serinë e dy humbjeve, por ata përjetuan një tjetër zhgënjim dhe humbën një ndeshje kualifikuese në shtëpi.
Lajmi i keq për brazilianët nuk mbaron me kaq. Gazeta lokale Globo shkruan se FIFA mund të vendosë të ndëshkojë Federatën e tyre (CBF) pas hetimit. Një gjobë ose një ndeshje para tribunave të zbrazëta, madje edhe një zbritje pikësh, janë të mundshme. Për Brazilin, i cili tani është në vendin e gjashtë, do të ishte një goditje e madhe.