Imazhet e shfaqura të enjtën në Kuvendin e Kosovës, nga njohës të proceseve politike po konsiderohet se do të ndikojnë në demokracinë e vendit.
Sipas njohësit të proceseve politike, Visar Xani, pamjet ku shihen duke u rrahur deputetë e ministra të kabinetit qeveritar, dëmtojnë imazhin e Kosovës.
Andaj ky po kërkon dialogim brenda sferës politike vendore.
“Konsiderojë se Kosova duhet të vnojë dialogimin e brendshëm me gjithë spektrin politik, duhet të promovojë një gjuhë të moderuar me kritika profesionale dhe etike të cilat nuk prodhojnë destabilizim, urrejtje politike meqë është rreziku se ato mund të shpërndahen dhe jashtë Kuvendit dhe pastaj të prodhohet dhunë”, deklaroi Xani
E në rast se kjo nuk ndodhë, sipas Xanit rrezikohet demokracia.
“Në qoftëse partitë politike në Kosovë nuk arrijnë ta gjejnë atë gjuhën demokratike, të përmbajtur, të moderuar të pranojnë kritikën atëherë është në rrezik demokracia, e gjithë shtetësia e Kosovës për shkak që këto lajme dhe dëmtime të imazhit e rëndojnë edhe më shumë Kosovën e cila është kohët e fundit e sulmuar, me masa dhe sanksione”, shtoi ai.
E politologu Fidan Ukaj, thotë se skenat e dhunës të para në Kuvend, përveç qytetarëve në tërësi, dërgojnë mesazh të jo të mirë edhe te votuesit e tyre.
“Këto skena sigurisht se do ta irritojnë qytetarin, votuesin dhe jepin një mesazh të keq tek këta të fundit sepse janë përfaqësues të këtyre votuesve dhe aty janë dërguar për të rregulluar jetën e qytetarëve, vendit të gjithë atyre që kanë marrë besimin e tyre”, vlerësoi Ukaj.
Përplasjet fizike mes deputetëve të pozitës dhe opozitës kishin ngjallur reagime të shumta, teksa u bënë jehonë edhe në mediat ndërkombëtare.
