Madje, sindikata e këtyre të fundit i dha një javë kohë Qeverisë për t’ia plotësuar kërkesën për shtesa nga 50 euro, përndryshe do të fillojnë me protesta.
Por, i pari i Ministrisë së Financave, Hekuran Murati tha të premten se kuleta e shtetit nuk do të hapet për këtë kategori.
“Në sektorin privat rritja e pagave duhet të vij nga punëdhënësi. Dhe këtë punëdhënësit kanë hapësirë, ne këtë e shohim nga niveli i qarkullimit edhe nga mbledhja e tatimit në fitimin e korporatave. Fitimi i korporatave është më i lartë se që ka qenë ndonjë herë, pra ka hapësirë që në sektorin privat kompanitë t’i rrisin pagat”, tha ai.
Murati u kërkoi punëdhënësve të sektorit privat që t’i shfrytëzojnë mundësitë që i ofron Qeveria
“Për të mbështetur tre muajt e parë rritjen pagave, në mënyrë që t’i rrisin pagat edhe në sektorin privat, sepse ka hapësirë. Sektorin privat e kemi mbështetur në vazhdimësi, dhe presim që edhe këto kompani të mos e shfrytëzojnë rastin vetëm të rrisin marzhat e tyre të fitimit siç kanë bërë deri tani, por që një pjesë të atyre fitimeve ta ndajnë edhe me ata që ua mundësojnë këtë fitim”, shtoi Murati.
Shefi i kuletës së shtetit foli edhe për shtesat për studentë dhe punëtorë të ndërmarrjeve publike.
“Aktualisht formulari i aplikimit është i hapur për studentë, shumë shpejt do t’i trajtojmë edhe shtesat për punëtorët e ndërmarrjeve publike dhe për kategori të tjera”, njoftoi Murati.
Ditë më parë, ishte Dhoma e Tregtisë dhe Industrisë e cila kërkoi që punëtorët e sektorit privat të mbështeten me shtesa nga 200 euro.
Kronika e gazetarit Gojart Jashari.
