As në këtë muaj nuk ka shtesa për zyrtarët publikë në Kosovë. E për këtë, Ali Gashi nga Sindikata e Pavarur e Administratës, thotë se Qeveria dhe Ministria e Financave, nuk e kanë marrë aspak seriozisht ekzekutimin e pagave me ligj të ri.
Gashi informoi që pas marrjes së pagës në muajin shkurt, të gjitha institucionet u kanë dërguar shkresa Ministrisë së Financave, derisa vlerësoi që nuk mund të ketë qenë problematike plasimi i pagave.
“Unë insistoj që Qeveria e Kosovës dhe Ministra, së paku ta bëjë harmonizimin e strukturës së Administratës publike në nivel lokal e qendror. Nuk e kanë marrë shumë seriozisht, për arsye se ne kemi administratë publike, i kemi institucionet që 23 vite dhe të gjitha të dhënat janë të azhurnuara në Ministri. Prandaj, kanë ekzistuar edhe listat e pagave. Ju informoj, që pas marrjes së pagës së shkurtit, të gjitha institucionet të nivelit qendror e lokal, i kanë bërë shkresa Ministrisë së Financave, i kanë informuar për defektet. Kështu që, nuk ka qenë shumë problematike për t’i plasuar pagat, sepse ka mjaftuar vetëm azhurnimi i të dhënave, ashtu siç janë dërguar nga institucionet”, deklaroi Gashi në emisionin “Ditari”.
I pyetur se a mund të ketë pasur probleme buxhetore, Gashi tha se për një gjë të tillë nuk ka informacione, megjithatë tërë situatën e quajti si keqmenaxhim.
“Keqmenaxhim është edhe kur nuk përdoren mjetet dhe nuk plasohen te qytetarët, në këtë rast përmes pagave. Prandaj, mendoj që është një blerje kohë”, potencoi Gashi në Tëvë1.
Andaj, Gashi tha se shpreson që shumë shpejt Qeveria Kurti të angazhojë staf shtesë për t’i përfunduar problematikat, përcjell teve1.info.
“Në qoftë se edhe në muajin tjetër ndodh e njëjta, atëherë definitivisht nuk është serioze dhe do i quajmë gënjeshtarë”, tha tutje Gashi.
Në njoftimin e Ministrisë së Financave dhe Ministrisë së Punëve të Brendshme, është bërë e ditur se shtesat e sipërpërmendura për muajin shkurt dhe mars do të paguhen në mënyrë retroaktive në pagën e muajit prill./teve1.info/.
