Në ditën e pushimit, dolën në punë.
Kjo meqë 120 deputetët e Kuvendit të Kosovës, ka dy muaj e gjysmë që nuk po arrijnë ta zgjedhin të parin e tyre.
E kjo ka bërë që përfundimi i sesionit pranveror, për herë të parë ta gjej Kuvendin e Kosovës të pa konstituuar.
Në mungesë të funksionalizimit, deputetët nuk pritet ta kenë pushimin e zakonshëm deri në vjeshtë, raporton Tëvë1.
Sipas nenit 66 të Kushtetutës së Republikës së Kosovës, Kuvendi i Kosovës zgjidhet me mandat katërvjeçar, duke filluar nga dita e seancës konstituive, e cila ka filluar me 15 prill 2025, por nuk ka përfunduar. Referuar nenit 12, paragrafi 5 të Rregullores se Kuvendit të Republikës së Kosovës: “Seanca konstituive përfundon me zgjedhjen e Kryetarit dhe nënkryetarëve të Kuvendit.
Nga drejtoria për media e institucionit legjislativ, kanë treguar se si i parasheh rregullorja dy sesionet e punimeve brenda vitit.
“1. Kuvendi zhvillon punën në dy sesione:
1.1. Sesioni Pranveror fillon të hënën e tretë të muajit janar dhe përfundon në fund të muajit korrik. 1.2. Sesioni Vjeshtor fillon të hënën e dytë të muajit shtator dhe përfundon në fund të muajit dhjetor. 2. Kuvendi, ndërmjet dy sesioneve, mund të mblidhet në seancë të jashtëzakonshme”, thuhet nga Kuvendi.
E analistët politik, thonë se bllokadat në shtetet e tjera janë parë tek formimi i qeverisë.
Por, jo edhe tek konstituimi i Kuvendit.
Për këtë, edhe deputetët duhet gjejnë një zgjidhje se si t’i kalojnë pushimet e kësaj vere.
“Kuvendi është nuk është konstituuar, për shkak të kësaj nuk ekziston edhe mundësia ligjore që deputetët të shkojnë në pushimin sezonal. Ndoshta mund t’i shfrytëzojnë këto dy ditë që kanë pushim, plazhet janë afër e mund të kthehen për dy minuta seancë, e ta vazhdojnë plazhin prapë”, shprehet Avdi Smajljaj.
Por, duket se një zgjidhje për pushime, deputetët e kësaj legjislature tashmë e kanë gjetur.
Kjo meqë në seancat e vikendit, numri i deputetëve në sallë nuk arrin në 100-të.
