Është dita e tretë e tensioneve në veri.
Në teren janë të angazhuar njësitet elitare të Policisë së Kosovës, KFOR-i e EULEX-i për të ruajtur rendin nga protestat e dhunshme të serbëve.
Kurse në Prishtinë krerët e institucioneve janë angazhuar në zhvillimin e takimeve me përfaqësues ndërkombëtarë.
Por, ende nuk është mbledhur Këshilli i Sigurisë Kombëtare.
Sipas Ligjit për Këshillin e Sigurisë së Kosovës, takimet thirren formalisht nga kryeministri.
“Kryeministri është i obliguar të thërras takimin e Këshillit të Sigurisë së Kosovës në rast se Presidenti i Republikës së Kosovës apo shumica e anëtarëve të përhershëm Këshillit të Sigurisë së Kosovës formalisht kërkojnë takim. Takimet mbahen pas njoftimit paraprak, siç është e përcaktuar me rregulloret në fuqi”, thuhet në ligj.
Pra të drejtën për ta thirrur këtë këshill e mban kryeministria. Mirëpo takime mund të kërkojë edhe presidenca.
Andaj Tëvë 1 ka dërguar pyetje në Zyrën e Presidencës e atë të kryeministrit në lidhje për një thirrje të mundshme, mirëpo nuk ka marrë përgjigje.
Ndërsa ish ushtaraku, Kadri Kastrati, ka kritikuar mungesën e një takimi të tillë, duke konsideruar se duhet një koordinim më i theksuar.
Si neglizhencë të institucioneve, mos-thirrja e Këshillit të Sigurisë, vlerësohet edhe nga Anton Nrecaj nga Instituti CLARD.
Këshilli i Sigurisë së Kosovës ka rol këshillues në të gjitha çështjet që lidhen me sigurinë e Kosovës dhe kontributin e tij për stabilitetin rajonal, në kohë të zakonshme.
Derisa, kompetencat e tij fuqizohen në rast të shpalljes së gjendjes së jashtëzakonshme, duke marrë kompetenca të ekzekutivit.
