Serbë e Kosovës të cilët kanë pasaportë të lëshuar nga Beogradi nuk do të mund të lëvizin pa viza në vendet e BE-së nga 1 janari i vitit 2024, atëherë kur hynë në fuqi vendimi për heqjen e vizave për Kosovën.
Këtë e ka thënë të mërkurën Raportuesi për Kosovën për çështjen e liberalizimit të vizave, Thijs Reuten, pas nënshkrimit të aktit ligjor.
Ai ka thënë se legjislacioni është i qartë dhe qytetarët e Kosovës mund të lëvizin pa viza vetë me dokumente të lëshuara nga Kosova.
“Besoj që legjislacioni është i qartë. Pasaportat që lëshohen nga autoritetet kosovare dhe pasaportat nga autoritetet serbe që jetojnë në Serbi, ata kanë liberalizim të vizave. Qytetarët e Kosovës me dokument të lëshuar nga autoritete e Kosovës mund të udhëtojnë pa viza” ka thënë ai në konferencën për media, përcjell teve1.info
Ndërsa, zëvendëskryeministri i Kosovës, Besnik Bislimi ka ftuar qytetarët serbë që të pajisen me pasaporta të Kosovës.
“Vendimi që është marrë sot ka të bëjë me udhëtimin pa viza për Kosovën, Beogradi nuk është në Kosovë. Ata që kanë pasaporta të lëshuar nga Beogradi shpresoj që këtë muaj ti shfrytëzojnë dhe ta marrin pasaportën e Kosovës që t’i shfrytëzojnë dobitë e këtij vendimi”, ka thënë Bislimi.
