Dyert pritet t’i hapin sërish me 1 shtator.
Kësisoj, edhe nxënësit pritet t’i kthehen sërish bankave shkollore.
E procesi mësimor këtë vit, duket se do të nis pa vonesa.
Kjo meqë grevë, nuk po paralajmëron Sindikata e Bashkuar e Arsimit të Kosovës.
Krejt kjo pas një takimi dyorësh mes përfaqësuesve të SBASHK-ut dhe Ministrisë së Arsimit.
“Këtë vit ne kërkojmë që ta shohim këtë vit shkollor edhe një mundësi për një fillim të ri të raporteve ndërmjet institucioneve dhe përfaqësuesve të punëtorëve të arsimit. Po e them këtë për shkak se në këtë drejtim, SBASHK-u vlerëson takimin që ka zhvilluar disa javë më parë me ministrin e arsimit, Hajrullah Çeku, takim i cili ka zgjatë më tepër se dy orë dhe janë shpalosë hapur të gjitha shqetësimet, kërkesat dhe pritjet e punëtorëve të arsimit”, thotë sekretari i SBASHK-ut, Ymer Ymeri.
Ymeri shtoi se edhe procesi i aplikimit për subvencionim të teksteve shkollore, ka shkuar pa ndonjë parregullsi.
“Besojmë shumë që ata me kohë do t’i pajisin nxënësit me librat dhe fillimin e vitit ta gjejmë për shkak se aplikimi është kryer, kanë aplikuar dhe shpresoj shumë që së shpejti do t’i subvencionojnë sipas kritereve që i ka përcaktuar dmth është një diçka që këtë vit mundet fillimi i vitit të ri shkollor nxënësit t’i gjejë me libra”, shprehet ai.
Por, nga Këshilli i Prindërve thonë se shqetësim edhe këtë vit mbetet kjo mënyre e subvencionimit.
“Sipas disa informacioneve, shkollat tanimë kanë filluar me përgatitjet për fillimin e vitit të ri shkollor. Përveç mënyrës së subvencionimit të teksteve shkollore, ende nuk kemi ndonjë ankesë konkrete për nisjen e procesit. Asgjë konkrete, mjetet te shumica e prindërve ende nuk kanë dalë edhe pse ata dëshirojnë t’i blejnë librat më herët për t’a shmangur tollovinë dhe mungesën e librave. Vitin e kaluar ka shkuar tërë viti e librat e caktuar ose fletoret e punës nuk kanë qenë në dispozicion”, thotë Linda Dula-nënkryetare e këshillit të prindërve të Kosovës.
Se a janë bërë të gjitha përgatitjet që mësimi të filloi me 1 shtator në gjithë vendin, Tëvë1 ka dërguar pyetje edhe në Ministrinë e Arsimit.
Por këta të fundit nuk kanë kthyer përgjigje.
