Politologu Avdi Smajljaj, ka thënë se partitë politike duhet të gjejnë një marrëveshje për zgjedhjen e presidentit apo presidentes.
Ai ka thënë se edhe shkuarja në zgjedhje nuk është zgjidhje për zgjedhjen e presidentit.
“Shkuarja në zgjedhje nuk është zgjidhje për presidentin. Do të ishte mirë që partitë t’i thërrasin mendjes ta dinë që kanë nevojë për njeri tjetrin, kanë interesat e tyre që mund t’i mbrojnë edhe pa shkuar në zgjedhje dhe ta gjejnë një kandidat që është i pranueshëm për të gjithë, ose të qëndrojnë në sallë”, ka thënë ai në emisionin “InfoNata” në Tëvë1.
Smajljaj ka thënë se nga Albin Kurti nuk ka një entuziazëm sikurse në vitin 2021 për ta propozuar Osmanin për presidente.
Por, ai ka thënë se Osmani ka mbështetje nga disa deputetë të LDK-së.
“Nuk ka entuziazëm sikurse në vitin 2021. Ndoshta LVV nuk e sheh si kandidate të pranueshme ose ka synim ta gjejë një kandidat që është i pranueshëm. Osmani ka mbështetje nga një numri i deputetëve të LDK-së”, ka thënë profesori universitar.
Megjithatë, ai ka thënë se opozita ka arsye për të mosvotuar Osmanin për presidente.
Smajljaj ka folur edhe për vendimin e Ramush Haradinajt që më s’do të jetë në krye të AAK-së.
Ai ka thënë se këtë e sheh si pjesë të reformave që kanë nisur paritë opozitare. Por, ai ka thënë se Haradinaj ka qenë figurë e pakontestueshme në AAK dhe largimi i tij nga udhëheqja e partisë mund të ketë edhe kosto.
