Mungesa e një marrëveshje politike, Kosovën po e mbanë me Qeveri në detyrë dhe pa Kuvend.
Por, duket që arritja e një ujdie është afër.
Pasi që deputetja e Nismës Socialdemokrate, Xhevahire Izmaku tha që në fundjavë pritet që të ketë një epilog pozitiv në takimin mes kreut të Vetëvendosjes, Albin Kurti dhe kreut të Nismës, Fatmir Limaj.
“Po pritet që kafja me u pi, kafja ose dreka deri në fundjavë dhe të shpresojmë që më në fund dikush po del mbi egot personale dhe egot partiake e ky duket që do të jetë zotëri Limaj sepse nga fillimi e ka ndërru diskursin për këtë vend”, tha Izmaku.
Por Izmaku tha prerazi që Limaj nuk ka hequr dorë nga kandidatura për kryekuvendar.
“Jo apsolotisht, ne jemi pra në atë diagonale të bisedimeve me çështjen që zotëri Limaj të jetë në krye të Kuvendit”, u shpreh ajo.
Por për kandidaten për kryetare të Kuvendit nga Vetëvendosje, Albulena Haxhiu kjo do të vendoset pas takimeve.
“Sa i përket Nismës, ne kemi thënë që kemi vullnet për bashkëpunim, ato do të ndodhin gjegjësisht do të ketë takime të kryetarit, kryeministrit Kurti me kryetarin Limaj dhe natyrisht që pas këtyre takimeve, pasi të përmbyllen ato do të ketë edhe njoftim për opinionin publik nesë do të ketë ose jo marrëveshje”, tha Haxhiu.
E Deputeti i Lidhjes Demokratike të Kosovës. Lutfi Haziri, tha se janë në pritje të arritjes së një marrëveshjeje politike ndërmjet Lëvizjes Vetëvendosje dhe Nisma Socialdemokrate për t’i dhënë fund krizës institucionale në Kosovë.
Të enjten në seancë nuk u pa kreu i Vetëvendosjes, Albin Kurti as ai i Nismës, Fatmir Limaj.
Tentimi i radhës për konstituimin e kuvendit është të shtunën.
