Situata në fshatrat Kovragë, Veriq, Osojan dhe Gurrakoc të Komunës së Istogut është përshkallëzuar si pasojë e zjarreve që kanë përfshirë zonat bujqësore dhe pyjore, duke krijuar një gjendje alarmante që kërkon vëmendje dhe kujdes maksimal.
Kryetari i Komunës së Istogut, Ilir Ferati, përmes një postimi në rrjetin social Facebook, ka bërë të ditur se është në terren së bashku me ekipet e Zjarrfikësve, Policinë e Kosovës dhe institucionet përgjegjëse, duke punuar me kapacitet të plotë për të lokalizuar dhe shuar vatrat e zjarrit.
“Qëllimi ynë është të parandalojmë përhapjen e mëtejshme të flakëve dhe të mbrojmë pronat, tokat bujqësore dhe sigurinë e banorëve”, theksoi Ferati.
Ai gjithashtu apeloi te qytetarët që të tregojnë kujdes të shtuar, sidomos në zonat bujqësore dhe pyjore, duke evituar djegien e barishtave, mbeturinave apo sendeve të tjera, sepse edhe një shkëndijë e vogël mund të shkaktojë dëme të mëdha dhe të pakthyeshme.
“Në rast se vëreni zjarr apo tym, ju lutem, lajmëroni menjëherë zjarrfikësit ose Policinë”, tha ai në apelin e tij drejtuar qytetarëve të komunës.
Komuna e Istogut mbetet në gatishmëri të lartë, ndërsa autoritetet vazhdojnë të monitorojnë situatën dhe të ndërmarrin të gjitha masat e nevojshme për mbrojtjen e jetës dhe pronës së qytetarëve.
