Nehat Baftiu është anesteziologu që së fundmi dha dorëheqje nga QKUK-ja. Si arsye renditi pagën dhe kushtet jo të mira të punës.
“Sot dua të shpreh hapur zhgënjimin tim për gjendjen në të cilën jemi si shëndetësi. Sot kur çdo ditë kemi ikje të mjekëve nga Kosova, kur çdo ditë kemi ikje të mjekëve nga sektori publik, kur ende nuk e kemi ligjin e pagave, kur nuk e kemi fondin për sigurime shëndetësore, kur nuk e kemi sistemin informativ të shëndetësisë – SISh, kur pozita e mjekut dhe stafit të mesëm në përgjithësi e atyre të Anesteziologjisë dhe Mjekimit Intenziv në veçanti lë shumë për të dëshiruar, kur mungon një sistem i mirëfilltë i punës, kur pacientët tanë shëtisin poshtë e lart nëpër spitale të vendeve tjera për të kërkuar ndihmë, nuk kam si të mos jem i mërzitur, zhgënjyer dhe i pezmatuar deri në palcë për këtë gjendje kaq të rëndë”, tha ai.
Pas largimit të tij, tashmë në QKUK kanë mbetur vetëm 52 anesteziolog. Ky numër në vazhdimësi ka shënuar rënie.
E një gjë e tillë po ndikon që puna nëpër klinika, sidomos në kirurgji të kufizohet.
Kolegu i Baftiut, Lulzim Emini thotë se numri I anesteziologëve duhet të jetë mbi 120, ndërsa situatën e tanishme e quajti alaramante.
Mungesa e stafit shëndetësor vërehet edhe tek infermierët. Njëri nga ta, Enlirat Duraku në emisionin “Ditari” në tëvë1, tha se edhe ai po pret që të largohet nga vendi.
Kronika e gazetares Valëza Sylejmani.
