60 ari dredhëza, i mbjelli vitin e kaluar. Por, rendimentit të tyre sivjet, nuk arriti t’i gëzohej, Fadil Osmani nga fshati Koliq.
Kjo pas reshjeve të mëdha të breshrit, që ranë të hënën mbrëma në këtë fshat të Prishtinës.
E dëmin që e pësuan, thonë se arrin deri afër 10 mijë euro.
“Dëmi vetëm në dredhëza për nja 8-9 mijë euro, këto janë dredhëza sezonale, 6 mujore, po doket…”, tha Osmani.
Ndërsa fat edhe me të keq, kishin fasulet.
Osmani thotë se reshje të tilla të breshrit, nuk janë të shpeshta në këtë fshat.
“65 vjet i kam, veç një herë si fëmijë e mbaj në mend që ka ra kaq shumë breshër…”, shtoi ai.
Por, probleme të tilla bujqit, nuk kishin shumë gjatë viteve të 90-ta.
Kjo pasi në këtë vend të këtij të këtij fshati, ishte i instaluar objekti rrufepritës.
Ndërsa tani, krejt çka ka mbetur nga ai, janë këto shtylla hekuri, të gjata prej 20 metrave.
Nga ky vend, për 10 vite rresht janë goditur retë me raketa në mënyrë që të mbroheshin të mbjellurat e bujqve.
E për mbi dhjetë vite, këtu punoi Xhemajl Gashi, nga fshati Mramor.
Ky e mbanë në mend kohën kur mbi 10 punëtorë shqiptarë e serb, kujdeseshin për tokat e bujqve.
“Këtu u kanë radari kryesorja që e kanë bo fotografimin e reve, breshrit e shiut. Kur e kanë pa që po vjen një shi e breshër prej lart, e kanë ditë saktë për sa mundet me ardh, janë përgatit edhe e kanë eleminu..”, Xhemajl Gashi, ish-punëtor në Objektin Rrufepritës.
E vendi nga ku lëshoheshin raketat kundër reve që sillnin breshër, ishte pak metra më poshtë.
Ndryshe, reshjet e fundit iu kanë shkaktuar dëme edhe bujqve në qytete të tjera të Kosovës.
Raporti i gazetarit Fidan Zejnullahu.
