Presidenti sirian, Ahmad al-Sharaa ka përjashtuar mundësinë që Siria të bashkohet me Marrëveshjet e Abrahamit, duke theksuar se konflikti i vendit të tij me Izraelin është ndryshe nga ai i vendeve të tjera arabe.
Në një intervistë për revistën saudite Al-Majalla, Sharaa deklaroi se Siria ndjek një politikë të “marrëdhënieve pa probleme” me fqinjët, por normalizimi me Izraelin nuk është opsion.
“Marrëveshjet u nënshkruan me shtete që nuk kishin tokë të pushtuar ose konflikte të drejtpërdrejta me Izraelin. Situata e Sirisë është e ndryshme, ne kemi Lartësitë e Golanit nën pushtim” tha ai, citon Anadolu.
Marrëveshjet e Abrahamit, të ndërmjetësuara nga Shtetet e Bashkuara gjatë presidencës së Donald Trump në vitin 2020, përfshijnë normalizimin e marrëdhënieve midis Izraelit dhe Emirateve të Bashkuara Arabe, Bahreinit, Sudanit dhe Marokut.
Sharaa tha se prioriteti i qeverisë së tij është të rikthejë Marrëveshjen e Çlirimit të vitit 1974, të ndërmjetësuar nga OKB-ja, ose të arrijë një marrëveshje të ngjashme për të siguruar stabilitet në jug të Sirisë nën mbikëqyrjen ndërkombëtare.
Ai gjithashtu konfirmoi se do të marrë pjesë në Asamblenë e Përgjithshme të OKB-së në Nju Jork këtë shtator – vizita e parë e një presidenti sirian që nga viti 1967 – duke e cilësuar këtë si një shenjë të qartë të rikthimit të Sirisë në skenën diplomatike ndërkombëtare.
“Kjo pjesëmarrje është një mesazh se Siria nuk është më në izolim,” tha ai, duke përmendur përmirësimin e marrëdhënieve me SHBA-në, Turqinë, Arabinë Saudite, Emiratet e Bashkuara Arabe, Katarin dhe disa shtete evropiane.
