Siria dhe Arabia Saudite nënshkruan të martën disa marrëveshje në sektorët e naftës dhe gazit, raportuan mediat lokale.
Në selinë e Ministrisë së Energjisë në Damask, kompania shtetërore Siriane e Naftës firmosi katër marrëveshje me kompani saudite, sipas Agjencisë Arabe të Lajmeve Siriane (SANA).
Sipas agjencisë, marrëveshjet përfshijnë “shërbime mbështetëse teknike dhe zhvillimin e fushave të naftës dhe gazit në Siri”, pa dhënë detaje mbi kompanitë saudite pjesëmarrëse, shkruan Anadolu.
Më 19 nëntor, drejtori ekzekutiv i Kompanisë Siriane të Naftës, Youssef Qaballawi, bëri të ditur se në rajonin perëndimor të Sahelit janë zbuluar pesë fusha të reja gazi.
Sipas të dhënave të vitit 2015, Siria ka rreth 8.5 trilionë metra kub rezerva të provuara gazi. Prodhimi ditor i gazit të pashoqëruar arrihet në rreth 250 milionë metra kub, duke përbërë 58% të prodhimit kombëtar të gazit.
Ndërkohë, gazi i lidhur me naftën përfaqëson 28% të prodhimit total, pjesa më e madhe e të cilit vjen nga lindja e lumit Eufrat.
Qeveria e re siriane, e drejtuar nga Ahmad al-Sharaa, po synon të forcojë sektorin e energjisë përmes marrëveshjeve dhe memorandumeve të mirëkuptimit me shtete dhe institucione të ndryshme, për të mbështetur rindërtimin dhe rimëkëmbjen ekonomike pas 14 vitesh konflikti civil.
