Kryetarja e Komunës së Preshevës, Ardita Sinani ka thënë se festa e 28 Nëntorit është shënuar në këtë komunë, ashtu siç i ka hije kësaj feste, pavarësisht pengesave.
Ajo ka thënë se gjatë gjithë muajit janë shënuar aktivitet të cilat janë financuar edhe nga Ministria e Kulturës së Kosovës.
Sinani në një intervistë për emisionin “Ditari” në Tëvë1, ka thënë se aktivitetet për shënimin e kësaj dite nuk do t’i ndalin pavarësisht pasojave.
“Pavarësisht mohimit, të drejtës tonë elementare për të përdorur simbolin tonë kombëtar, po rezistojmë dhe po festojmë ashtu siç i ka hije secilit shqiptar anekënd botës. Rezistenca na bën të fortë, për të treguar se ne jemi këtu në tokën tonë dhe pavarësisht pasojave të cilat mund t’i kemi ne rezistojmë”, është shprehur Sinani.
Sipas saj, prezenca e ambasadorit të Shqipërisë në Beograd, në festën e 28 Nëntorit është një nder i veçantë.
“Prezenca e ambasadori shqiptar është për tu veçuar e ka simbolikën e vet, jo vetëm për festën e 28 Nëntorit, është shumë e rëndësishme prezenca e shtetit shqiptar dhe Republikës së Kosovës, por për ditën e sotme është një krenari e veçantë”, ka thënë ajo.
