Këshilltarja e kryeministrit Albin Kurti për Preshevë, Medvegjë dhe Bujnoc, Ardita Sinani, ka përkujtuar 20 janarin e vitit 2013-të, kur mijëra pjesëtarë të forcave elite të xhandarmërisë serbe kanë hequr me dhunë lapidarin e dëshmorëve të UÇPMB-së nga qendra e Preshevës.
Sinani thotë se qytetarët e Komunës së Preshevës nuk do ta harrojnë tmerrin që kanë përjetuar edhe pas 11 viteve.
“Edhe sot kur po bëhen 11 vite, qytetarët e komunës së Preshevës nuk do ta harrojnë tmerrin e përjetuar. Në mëngjesin e hershëm të 20 janarit të vitit 2013, qendra e Preshevës ishte mbuluar me forca enorme të xhandarmerisë serbe. Me mijëra pjesëtarë të forcave elite të xhandarmerisë, të udhëhequr nga komandanti i tyre kishin zbarkuar në Preshevë për të hequr dhunshëm lapidarin me emrat e dëshmorëve të UÇPMB-së”, ka shkruar ajo në Facebook.
Tutje, ajo ka thënë se pjesëtarët e xhandarmërisë serbe kanë hequr lapidarin, por nuk mund të arrijnë të shlyejnë nga kujtesa sakrificën sublime të martirëve.
“Edhe pse ia arritën qëllimit që dhunshëm të heqin lapidarin, e me këtë të rihapin plagën për të rënët e heronjve tanë, nuk do t’ia arrijnë të shlyejnë nga kujtesa sakrificën sublime të martirëve tanë”, ka shkruar ajo./teve1.info/
