Pasi përfundoi aksioni i forcave serbe mbi shtëpitë e familjes Jashari, trupat e 54 dëshmorëve u vendosën në një depo në dalje të Skenderajt. E këtu, përgjegjësia për t’i ruajtur këta trupa, iu besua ish-ushtarit të UÇK-së, Naser Kaqkinit. Ky i fundit për Tëvë1, ka zbuluar çdo detaj të atyre ditëve, ndërsa Xhafer Murtezaj ka treguar se si u shpëtuan trupat nga plani i fshehtë serb.
Janë plagët që i pa 26 vjet më parë.
E këto, ishin në trupin e komandantit legjendar, Adem Jashari.
Është ky, ish-ushtari i UÇK-së, Naser Kaqkini.
Ky i fundit me 9 mars të vitit 1998, në këtë depo në dalje të Skenderajt, mori një detyrë të rëndësishme.
Ajo ishte t’i ruante 54 trupat e pajetë që heroikisht ranë në shtëpitë e Jasharëve, vetëm disa ditë më parë.
Kaqkini, kujton mbrëmjes e asaj të hëne, kur nga këtu u larguan të gjithë.
“Në mbrëmje kur u larguan të gjithë, mbetëm vetëm 5-6 persona. U afrua një qen me kap një xhenaze i kam ra shkelum dhe kam bërtit: Kush po ndalet me mua? Mos të shkoj me marrë nënën (me i ruajt xhenazet). Atëherë ndalet edhe një person. Vetëm me qenë pastaj kemi pas punë. Qentë kanë ardh pas erës së kufomave”, tha ish-ushtari i UÇK-së, Naser Kaqkini.
Ani pse kanë kaluar mbi dy dekada, Kaqkini e mban në mend çdo detaj të atyre ditëve.
Madje, edhe ku ishte i vendosur secili dëshmor, kur i zbritën nga kamionët serbë.
“Trupat e parë i prunën në atë qoshen aty dhe ia filluan këtu, në këtë pozicion ka qenë Ademi, tani kanë vazhduar më poshtë, nëna e Ademit, pastaj Shabani e Hamza”, deklaroi Kaqkini.
E këta dy të fundit, nuk u sollën së bashku me trupat e tjerë.
“Shabanin e Hamzën, ka ora 11:30 na i kanë sjellë, në një arkivol, kishin qenë dytë, të kthyer njëri nga koka e tjetri nga këmbët. I kemi shkarkuar arkivoli nga vetura”, u shpreh ish ushtari Naser Kaqkini.
Oborri i kësaj depoje, ato ditë marsi ishte i mbushur me dhjetëra ushtarë serbë.
Prandaj bisedat e tyre lehtë mund të dëgjoheshin.
“Folshin (serbët) se cila grua ka luftuar si mashkull. Unë i kam njohur Jasharët, kam pasur shoqëri, po gratë nuk i kam njohur. Pastaj kur kam pyetur (fol serbisht) se cila është gruaja me flokë të bardha, kishte qenë gruaja e Ademit. 3:30 Kushtrimi në dy vende e ka pas dorën e thyer prej plumbave dhe krejt në gjoks i ka pasur. Vetëm nëna e Ademit e ka pasur një fishek direkt në zemër”, tregoi Kaqkini.
E plani i forcave serbe, ishte që këta trupa të dërgoheshin në një vend të panjohur për shqiptarët.
Por, ndërhyrja e Xhafer Murtezajt e Zekeria Canës, bëri që trupat e Jasharëve, të shpëtohen.
Xhafer Murtezaj për Tëvë1, tregon bisedën me ish-komandantin e stacionit policor në Skenderaj, Ilia Trajkoviq, para trupave të Jasharëve.
“Na i ka bo, folni çka po doni. Zekeria Cana u prezantua, tha jam profesor, folni çka po doni edhe na shajti serbisht, me nënë. Jemi tërhequr dhe na urdhëruan t’i marrin kufomat”, tha ish-mësimdhënësi, Xhafer Murtezaj.
26 vite pas, trupat e familjes Jasharit dhe dëshmorëve të tjerë të 5,6 dhe 7 marsit, pushojnë në varrezat e kompleksit memorial “Adem Jashari” në Prekaz.