E pa vdekjen me sy, u dhunua, u plagos dhe megjithatë i mbijetoi masakrës së Shavarinës në Çikatovë të Vjetër.
Behar Topilla, ishte i mbijetuari i fundit i masakrës së Shavarinës në Drenas ku u vranë mbi 40 civilë shqiptarë.
Pas luftës me një sëmundje të rëndë, Behari ndërroi jetë në Suedi, por historia e tij do të mbetet përjetësisht e gjallë.
Në Gllanasellë, familjarët dhe banorët e fshatit kanë hapur dyert për ngushëllime. Axha i Beharit, Ali Topilla, ka rrëfyer tmerrin që përjetoi nipi i tij dhe bashkëfshatarët gjatë luftës..
“Brenda në kamion forcat serbe i kanë futur 44 shqiptarë dhe i kanë dërguar nga Qirezi në Drenas. Kur kanë mbërritur tek miniera e Feronikelit e kanë ndalur kamionin dhe i kanë detyruar të zbresin. Aty ka qenë një gropë e madhe dhe kanë filluar të shtënat me armë. Behari ishte rrëzuar dhe u mbulua nga kufomat e tjera”, tregon axha i Beharit.
Topilla shprehet i zhgënjyer që ndër vite është bërë shumë pak punë nga institucionet për dokumentimin e krimeve të luftës.
Sipas tij koha po kalon dhe shumë dëshmitarë po vdesin duke mos u rrëfyer për tmerret që kanë përjetuar.
“Mendoj se institucionet tona duhet të angazhohen më shumë në dokumentimin e krimeve të luftës sepse në Kosovë janë kryer shumë masakra. Për shkak të rrethanave të vështira, Behari u largua nga Kosova për në Suedi, ku më pas edhe krijoi familje atje”, thotw Ali Topilla.
Historia e Beharit u bë e njohur në mbarë botën përmes gazetës amerikane The Salt Lake Tribune, e cila në atë kohë botoi artikullin me titullin “Sole Survivor” – “I mbijetuari i vetëm”.
