Në ditët me temperatura të larta, kremrat me faktor mbrojtës ndaj rrezeve ultraviolet (SPF) bëhen pjesë e përditshmërisë.
Por një pyetje e zakonshme që lind është: A është e sigurt të përdoret një krem kundër diellit i skaduar? Po, kremi kundër diellit skadon dhe pasojat mund të jenë serioze.
Sipas rregulloreve të Agjencive për Kontrollin e Ushqimit dhe Barnave (FDA, EMA), çdo produkt që përmban SPF duhet të ketë një afat të qartë përdorimi. Zakonisht, kremrat për diell kanë jetëgjatësi deri në 3 vjet, por vetëm nëse ruhen siç duhet; në vend të freskët, larg dritës dhe nxehtësisë direkte.
Nëse data e skadencës është fshirë ose produkti është përdorur shumë kohë pas hapjes, është e domosdoshme të vlerësohet pamja, aroma dhe struktura e tij për të kuptuar nëse është ende i përdorshëm.
Përbërësit aktivë si oksibenzoni, avobenzoni dhe oktisalati janë kimikate të ndjeshme që degradohen me kalimin e kohës dhe ekspozimin ndaj dritës ose oksigjenit.
Si pasojë, produkti humb efektin mbrojtës ndaj djegieve dhe dëmtimeve të ADN-së në qelizat e lëkurës.
Sipas American Academy of Dermatology, produktet e skaduara shpesh ndryshojnë në aromë, strukturë dhe ngjyrë, tregues të degradimit ose kontaminimit bakterial.
Përdorimi i tyre mund të shkaktojë skuqje, scarim të lëkurës, reaksione alergjike, bllokim të poreve dhe shfaqje aknesh.
Sipas Organizatës Botërore të Shëndetësisë (WHO), SPF-ja e skaduar nuk është vetë kancerogjene, por duke eliminuar mbrojtjen ndaj rrezatimit ultravjollcë, faktor kyç i melanomës rritet ndjeshëm rreziku për kancer të lëkurës.
Si ta kuptoni që SPF-ja është skaduar? Aroma e rëndë ose e ndryshuar, konsistencë ujore, me grimca ose shtresa të ndara, ngjyrë e verdhë apo kafe, formim shtrese të bardhë në fund të shishes.
Edhe pse përbërësit si zinku dhe dioksidi i titaniumit janë më të qëndrueshëm ndaj dritës, këto produkte përmbajnë gjithashtu emulgatorë dhe konservues që degradohen me kohën. Kontrolloni gjithmonë datën e skadencës në paketim. Aplikoni sasinë e duhur.
