Deputeti i Partisë Liberale Egjiptiane (PLE), Veton Berisha, ka reaguar ndaj komenteve raciste që kanë qarkulluar në rrjete sociale dhe media pas zgjedhjes së Dimal Bashës si kryetar i Kuvendit të Kosovës.
Në emisionin “Mesditë” në Tëvë1, Berisha shprehu shqetësimin e tij të thellë për mënyrën se si, sipas tij, Basha është paragjykuar për shkak të dukjes së tij.
“Siç e dini, edhe nëpër komente, ka qenë një qasje shumë raciste përballë z. Bashës vetëm për shkak të dukjes së tij, në kuptimin që ai është zeshkan. Kjo më ka penguar shumë, sepse është paragjykuar jashtëzakonisht shumë,” tha Berisha.
Ai theksoi se pamja e jashtme nuk duhet të jetë kriter për të gjykuar vlerat e një individi.
“U kuptua shumë qartë që ai mund t’i ketë shumë vlera. Dukjen e tij e cakton vetëm i Madhi Zot. Ne, si pjesëtarë të komuniteteve, ndjehemi të prekur kur paragjykimi bëhet mbi bazën e dukjes apo identifikimit me komunitete të tjera. Kjo është jashtëzakonisht e papranueshme,” u shpreh deputeti.
Berisha shtoi se ky lloj paragjykimi nuk është vetëm fyes, por edhe diskriminues ndaj përkatësisë etnike të një përfaqësuesi të zgjedhur.
“Ai është deputet dhe ka përkatësinë e tij etnike. Pse e ka një dukje të zeshkët, nuk do të thotë që nuk mund të jetë në një pozitë të lartë. Më ka bërë të ndihem keq. Çfarë nëse nesër unë do të isha kryetar i Kuvendit? Paramendoni që gjykimet të bëhen mbi bazën e përkatësisë sime etnike,” shtoi ai.
Në fund të intervistës, Berisha theksoi nevojën për ndërhyrjen e institucioneve të drejtësisë në raste të tilla.
“Edhe unë mendoj që për kësi raste duhet të reagojë edhe gjykata, sepse një qasje e tillë, me të vërtetë, është bërë boll,” përfundoi Berisha.
