Moshapja e telefonit pasditen e së shtunës bëri që familjarët të dalin t’i kërkojnë në fshat.
Por tre fëmijë të mitur ishin zënë nga shembja e një objekti të pabanuar.
E gjithë kjo ndodhi derisa ishin duke luajtur mes vete në Jabllanicë të Gjakovës.
Si pasojë, tre të miturit ndërruan jetë.
“Unë me dy prindët e Idealit e të Ramës jemi dalë në aksham, janë dalë me lujt këta tre djemtë edhe janë ardhë prej shitores knej kanë hy kanë lujt këtu, por t’u lujt këtu ka ndodhë kjo fatkeqësi e keqe që është shemb ky objekt. E kemi kuptu diku pas orës 5, pasi i kemi thirrë në telefona, nuk i hapshin telefonat, kur jemi ardhë me i lypë këndej e kemi pa objektin e rrëzuar edhe e pytëm pronarin se pronari është atje, kush e ka rrëzu këtë. Jo se di, tanshi kur i kemi ni telefonat tu i thirrë brenda nën plloça. Edhe si i kem ni e kem thirrë policinë, e kem thirrë ambulancën, zjarrfikësat, kanë ardhë për një kohë t’shkurt i kanë nxjerrë kufomat pa shenja jete”, ka treguar Përparim Ademi, familjar i njërit prej tre viktimave.
Rasti është konfirmuar edhe nga Policia e Kosovës.
Kjo tragjedi sipas Policisë së Kosovës ndodhi si pasojë e shembjes së objektit prapa meje në rrethana të panjohura.
Për tërheqjen e trupave të pajetë ndihmuan bashkëfshatarët.
“Kena marrë pjesë si fshat komplet, jemi tërheqë, dikush me traktora dikush me asi, dikush me duar. Dy kanë qenë qetu, njani ka qenë ma veç qetu mas juve, nuk ka pasë shansa me shpëtu hiç se ju ka ra bajagi gjatë me nejt nën gërmadha”, ka thënë Bajrush Brahimaj banor i fshatit.
Ndërsa sipas Brahimajt, vet objekti nuk ka pasur rrezik shembjeje më parë.
“Ka qenë një shitore e para lufte, është djegë në luftë edhe s’u merr kërkush më me të, edhe është si anash fshatit qitu, nuk na ka interesu kërkujt edhe s’ka pasë diçka lëvizje të njerëzve këtu, qe kish mujt me u hek, s’na kish pengu kërkush. Po kurrë se ka mendu kërkush këtë rast”, thotë ai.
Kurse Prokuroria Themelore në Gjakovë ka hapur rast për vdekjen tragjike të tre fëmijëve në Jabllanicë.
Me vendim të Prokurorit të Shtetit, trupat e pajetë janë dërguar për obduksion në Institutin e Mjekësisë Ligjore (IML), si dhe është iniciuar rast “Shkaktimi i rrezikut të përgjithshëm”. Prokurori i Shtetit, në koordinim të ngushtë me Policinë e Kosovës, po ndërmerr të gjitha veprimet e nevojshme për zbardhjen e këtij rasti.
E ngushëllime familjeve të tre fëmijëve u ka shprehur presidentja e Kosovës, Vjosa Osmani, kryeministri Albin Kurti, kryekuvendari Glauk Konjufca dhe partitë opozitare.
Ngushëllime për fëmijët ka shprehur kryetari i Gjakovës, Ardian Gjini.
Të miturit, Veton Morina, 13 vjeç, Ideal Rama dhe Ramë Mehmetaj 15 vjeç do të varrosen të hënën në ora 14:00 në fshatin Jabllanicë të Gjakovës.
