Udhëtimi që nisen me trenin Prishtinë- Pejë, nuk shkoi siç duhet.
Mu në kohën kur treni ishte në lëvizje, disa persona të pandërgjegjshëm hodhën gurë në drejtim të tij.
Nga ky sulm që ndodhi teksa treni po kalonte nëpër fshatin Grabovc, lëndime pësoi kjo udhëtare.
26 vjeçarjes që mori lëndime në kokë, ndihma e parë iu dha në vendin e ngjarjes, e për trajtim të mëtutjeshëm u dërgua në Qendrën e Mjekësisë Familjare në Drenas.
Rasti është duke u hetuar nga policia e Kosovës.
“Viktima femër kosovare, ka njoftuar policinë se derisa ka qenë duke udhëtuar në tren (drejtimi Prishtinë–Pejë), dikush ka hedhur një guri në drejtim të trenit, ku ankuesja është qëlluar në kokë. Viktima pas pranimit të trajtimit mjekësor është liruar”, thuhet nga Policia e Kosovës.
Lidhur me ngjarjen që ndodhi të shtunën, kanë reaguar edhe nga kompania hekurudhore “Trainkos”.
Ata dënuan ashpër sulmin që është bërë ndaj tyre.
“Ky akt i papërgjegjshëm dhe i rrezikshëm përbën një kërcënim serioz për sigurinë e pasagjerëve dhe stafit tonë, si dhe për integritetin e shërbimeve tona hekurudhore. Këto veprime nuk janë vetëm të papërgjegjshme dhe të paligjshme, por përbëjnë rrezik serioz për jetën dhe shëndetin e pasagjerëve, stafit hekurudhor dhe gjithë pjesëmarrësve në këtë shërbim publik”, thuhet nga Trainkos.
Për një ekspert të komunikacionit, e gjithë ngjarja cilësohet si një krim.
“Ajo më shumë i takon krimit që do të thotë që është vepër penale në qoftë se dikush e gjuan trenin me gurë dhe pikërisht ajo që ne e konsiderojmë aksident edhe krim në komunikacion atëherë krim është në qoftë se dikush e hedh gurin e lëndon ose nga pasojat e hedhjes së gurit mundet me ardh deri te lëndimi trupore ose për fat të keq edhe te fataliteti”, thotë Nol Deda.
Vetëm në javët e fundit janë regjistruar disa aksidente mes trenit dhe veturave, njëra prej të cilave me fatalitet.
Profesori Nol Deda tregon se cilët janë shkaqet më të shpeshta të këtyre aksidenteve.
“ I përkufizojmë në disa faktorë, faktori njeri është sa i përket drejtuesit të automjetit dhe drejtuesit të trenit, pastaj vjen infrastruktura rrugore dhe ajo hekurudhore. Si faktorë i tretë mundet me ardh edhe si faktorë i njohurive mbi sigurinë e komunikacionit rrugorë dhe hekurudhor”, vlerëson ai.
Ditë më parë janë dëmtuar edhe vagonët e riparuar të stacionit hekurudhor të Hanit të Elezit.
