Shenjat e gjakut janë ende në rrugën “Ilir Merturi” në komunën e Klinës.
Këtu te dielën në mesnatë u plagosën katër anëtarë të familjes Bullaku nga fshati Jashanicë i kësaj komune.
Dy nga ta u therën e dy të tjerë u plagosën me armë zjarri.
Autorë të këtij akti dyshohet të jenë, djemtë e një familje në fshat, mbiemri i së cilës është i njohur për redaksinë.
Nëna e djemve të plagosur, Hasibe Bullaku thotë se me familjen që dyshohet se ia plagosi të bijtë, kanë pasur një problem para shtatë vitesh, për një lopë.
Ajo me zë të dridhur thotë se mund të kishte katër kufoma në shtëpi.
Sipas 50 vjeçares askush nuk i vizitoi nga institucionet lokale ose qëndrore.
Për gjendjen e tyre shëndetësore, detaje dhanë Spitali i Përgjithshëm në Pejë.
“Tre pacientë po trajtohen në Repartin e Kirurgjisë, ndërsa një pacient po merr trajtim në Kujdesin Intensiv. Ekipi ynë i mjekëve po u ofron trajtimin e nevojshëm mjekësor të gjithë pacientëve. Tre prej tyre janë në gjendje stabile shëndetësore, ndërsa një pacient është në gjendje më të rënduar. Konsiliumi i mjekëve është duke kryer ekzaminimet e nevojshme për këtë rast”, thuhet në përgjigje.
E të hënën, dy nga të dyshuarit u arrestuan nga Policia e Kosovës.
Që janë duke u zhvilluar hetimet për këtë rast tregon edhe zëdhënësi i Prokurorisë Themelore në Pejë, Shkodran Nikçi.
Autoritetet ende nuk kanë identifikuar motivet që kanë dërguar deri tek ky akt.
