Autore: Jona Kelmendi
Vetura e dëmtuar u kthye në vendngjarje.
Bashkë më të, edhe shoferi që dyshohet se e voziti.
Por ky i fundit, shpejt përfundoi nën prangat e Policisë së Kosovës.
Kjo nën dyshimin se mesditën e së shtunës, goditi qëëlimisht një grup të rinjsh në rrugën “Kuvendi i Arbërit”.
E gjithë ngjarja, erdhi pasi paraprakisht të rinjtë u gjuajtën me armë zjarri në rrugën “Fahri Fazliu”
Nga QKUK kanë thënë se njëri nga personat që u godit me veturë, ka marrë lëndime të rënda trupore.
“Për momentin është i hospitalizuar në Klinikën e Ortopedisë, ka lëndime të rënda trupore dhe është në observim të mëtejmë klinik, kardiologjik dhe laboratorik. Parametrat për tani janë stabil. Nesër do të mblidhet konsiliumi dhe do të vendosim për trajtimin e tij kirurgjik”, tha Sami Delijaj – mjek kujdestar në QKUK.
Ndërsa është bërë e ditur që dy të tjerët janë liruar pas tretmanit mjekësor.
Një ditë pas ngjarjes, detaje kanë dhënë edhe Policia e Kosovës.
“Raportohet se ka ndodhur një incident me armë zjarri ndërmjet dy grupeve, ku janë përfshirë katër persona të dyshuar meshkuj kosovar. Më pas, njëri nga të dyshuarit ka goditur me veturë një të dyshuar tjetër dhe dy persona të tjerë, dëshmitarët meshkuj kosovar. Në vendin e ngjarjes kanë dalë njësitë përkatëse policore, me ç’rast janë gjetur dhe sekuestruar dy gëzhoja, një fishek dhe një predhë, si dhe është arrestuar një i dyshuar. I arrestuari pas intervistimit me vendim të prokurorit dërgohet në mbajtje”, thuhet nga Policia e Kosovës.
Sipas Policisë së Kosovës hetimet për zbardhjen e plotë të rrethanave të këtij rasti po vazhdojnë.
