Rruga “Vushtrria” në kryeqytet u bllokua pasditen e së mërkurës për qarkullim.
Në lagjen Tophane në Prishtinë, ndodhi një grabitje e armatosur në një nga këmbimoret që gjenden në këtë rrugë.
Reagimi policor ishte i menjëhershëm ku edhe pati shkëmbim me armë zjarri me të dyshuarin.
Aty mbeti plagosur i dyshuari për këtë grabitje, i cili pas disa minutash edhe u arrestua. Derisa sipas burimeve të televizionit brenda policisë, janë dhe dy policë që u lënduan gjatë ndërhyrjes.
Në vendngjarje janë parë edhe zyrtarë të Inspektoriatit Policor të Kosovës për shkak se këtu ka pasur përplasje me armë mes policisë dhe të dyshuarit
Lajmin e kanë konfirmuar edhe nga Policia e Kosovës, ku kanë njoftuar se kanë arritur të arrestojnë në Obiliq të dyshuarin.
“Si reagim ndaj të shtënave të të dyshuarit, në përpjekje për të parandaluar grabitjen një qytetar po ashtu ka shtënë me armë zjarri. Pas marrjes së informacionit, zyrtarët e Policisë së Rajonit të Prishtinës kanë dalë në vendngjarje, kanë ndërrmarrë të gjitha masat e nevojshme operativo-policore dhe pak minuta pas raportimit të rastit, kanë arritë që në Obiliq të arrestojnë personin dyshuar i cili është i lënduar”, thuhet nga Policia e Kosovës
Po ashtu, nga zyrtarët policorë u sekuestrua edhe arma me të cilën dyshohet se është kryer grabitja.
“Të njëjtit për shkak të lëndimeve ( dyshohet të jetë plagosur) i është ofruar tretmani i nevojshëm mjekësor. Ndërlidhur me rastin policia ka sekuestruar : -veturën e të dyshuarit, si dhe -një armë automatike, të tipit AK-47. Ndërkaq hetuesit po vazhdojnë me ndërmarrjen e veprimeve hetimore policore për të zbardhur plotësisht rrethanat e ngjarjes”, ka bërë të ditur policia.
Sipas burimeve të Tëvë1, i arrestuari kishte kryer grabitje në një këmbimore tjetër përballë kësaj në lagjen “Tophane” në Prishtinë dhe se ishte recidivist.
