13 persona janë dërguar në mbajtje, pasi që u përfshinë në një përleshje me armë zjarri. Rasti ndodhi në orët e hershme të së mërkurës afër një klubi nate, ku për pasojë një person u plagos e tre morën lëndime trupore. Nga Klinika Emergjente thanë se gjendja e të plagosurit është stabile.
Kishin shkuar për të bërë qejf në një nga diskotekat e kryeqytetit.
Por me të dalë nga aty, 13 persona u përfshin në një përleshje me armë zjarri ku disa nga ta mbetën të lënduar.
E katër prej tyre morën trajtim mjekësor në Klinikën Emergjente në QKUK, ku njëri po vazhdon ende mjekimin.
Për gjendjen e tyre, për tëvë1 foli drejtori i kësaj Klinike, Naser Syla i cili tha se të njëjtit janë shoqëruar më pas nga Policia.
“Janë sjellë një herë tre persona, një i plagosur me armë zjarri kurse dy tjerë me lëndime trupore edhe pas trajtimit në Qendrën Emergjente, ky i plagosuri është pranuar për trajtim të mëtutjeshëm në Klinikën e ORL-së kurse dy tjerë janë lëshuar në përcjellje të Policisë. Edhe rreth orës 05 të mëngjesit dmth prej rastit të njëjtë është sjellë edhe një person ai i lëndum me mjete të goditura është trajtuar në Qendrën Emergjente prapë është lëshu në përcjellje të Policisë. Ka qenë në gjendje stabile, për sot nuk e di çka me thënë”, tha Syla.
Rastin e konfirmoi edhe Policia e Kosovës ku treguan se me të marrë informatën, kanë dalë në vendngjarje.
Në komunikatë, u bë e ditur se 13 personat e përfshirë në rast tashmë janë dërguar në mbajtje.
“Bazuar në informacionet e deritanishme raportohet për katër persona të lënduar, njëri prej të cilëve dyshohet të ketë marrë lëndime nga arma e zjarrit ndërsa tre të tjerë kanë pësuar lëndime gjatë përleshjes ku dyshohet të jenë përdorë mjete të forta. Hetuesit policor në koordinim me prokurorinë, ndërmarrin veprimet hetimore për ndriçimin e plotë të rastit. Deri tani nga ana e policisë janë identifikuar, arrestuar dhe dërguar në majtje 13 persona të cilët dyshohet të jenë të përfshirë në këtë rast”, thuhet nga Policia e Kosovës.
Nga Policia ende nuk kanë treguar se cili dyshohet të jetë motivi, derisa rasti është cilësuar si “vrasje në tentativë”.
