Në podrumin e këtij ashensor mëngjesin e së enjtes një person u gjet i vdekur.
Ai dyshohet se pasi hapi dyert brenda hapësirë nuk ishte ashensori dhe ra poshtë.
Kjo ndodhi në lagjen Dardania në Prishtinë, tek banesat e gjelbra.
“Rr. ‘Sadik Bekteshi’ Prishtinë, 21.03.2024 – 05:55. Viktima mashkull, shtetas i Shqipërisë, është gjetur pa shenja jete në hapësirën e bodrumit të ashensorit të një banese. Në vendin e ngjarjes kanë dalë njësitë përkatëse policore, ndërsa ekipi mjekësor ka konstatuar vdekjen e viktimës”, thuhet në përgjigjen e Policisë së Kosovës.
Por pavarësisht së këtu humbi jetën një person, ashensori vazhdon të përdoret nga qytetarët.
Ani pse gjendja e tij nuk është aspak e mirë.
Ashensori aktualisht gjendet në katin e 10, por dera mund të hapet këtu në katin e parë, e kjo pasi banorëve po ua rrezikon jetë atyre.
Madje sipas, Muharrem Dobordolit i cili banon në katin e shtatë të kësaj banese, çdo javë ashensori është jashtë funksionit.
“Ky nuk është aspak i sigurt, pasi çdo javë duhet riparim, çdo javë tej i pasigurt, po s’po kemi çka me bo, unë nuk po e di pse po lënë ashtu”, thotë ai.
E gjendja e mirë nuk është aspak as në hyrjen e tretë të këtyre ndërtesave.
“Kisha bo apel të institucionet që të vijnë inspektorët ta kontrollojnë liftin mundësisht organet përgjegjëse le të investojnë në mënyre që banorët fëmijët të jenë të sigurt në këtë lagje” thotë Astrit Kasapolli, banor i lagjes Dardania.
E Inspektimi i ashensorëve pavarësisht nëse është i ri apo i vjetër duhet të bëhet një herë në vit.
“Në ndërtesat e vjetra, ashensorët e vjetër janë të pasigurt, andaj i kisha lut komunën e Prishtinës që të mos qet tenderë për riparim, por le të qetë tender për ndërrim të ashensorëve pasi munden me pësua njerëzit me fatalitet. Inspektim duhet të bëhet çdo vit, nëse është ashensor të ri apo të vjetër, sa i përket ashensorëve të vjetër ne as nuk i marrim në mirëmbajtje se nuk kemi as pjesë të atyre ashensorëve”, thotë pronarja e një kompanie të instalimit të Ashensorëve, Hanife Gashi.
Nga Komuna e Prishtinës bëjnë më dije se inspektimi i ashensorëve është kompetencë e Ministrisë së Tregtisë.
“Komuna e Prishtinës çdo vit ndanë mjete për riparimin e ashensorëve, kërkesa të cilat i bëjnë qytetarët. Kompetencë për mirëmbajtjen e ashensorëve nuk e ka Komuna e Prishtinës kompetenca bie mbi qytetarët të cilët janë përgjegjës për hyrjet e tyre e kompetencë është Ministrisë që të bëjë inspektime dhe nëse nuk ka pranim është obligueshme që të bëjë ndalimin e tyre”, ka deklaruar zyrtari për Energjetike, Bashkim Sadiku.
E nga Ministria e Tregtisë përgjegjësin për inspektimin e ashensorit ku humbi jetën shtetasi i Shqipërisë e ka hedhur te Komuna e Prishtinës.
“Inspektorati komunal për ndërtim/banim në varësi të organizimit, në përputhje me Ligjin për Ndërtesat e Banimit në Bashkëpronësi dhe dispozitave ligjore të Ligjit për Ndërtim, kryen inspektim të ashensorëve në ndërtesat e banimit. Andaj ju rekomandojmë qe pyetjen ta adresoni tek inspektorati komunal, Prishtinë”.
Ndryshe, 54 vjeçari që humbi jetën është dërguar për obduksion në Institutin e Mjekësisë Ligjore.
