Ndërkohë që shumë njerëz përdorin shkopinj për pastrimin e veshëve, disa mund të mos e kenë parasysh se mund të dëmtojnë veshin duke menduar se po e pastrojnë.
Times Of India ka shkruar se si e dëmtojnë veshin këta shkopinjtë.
Shtyrja e dyllit më thellë në kanal.
Dylli që gjendet në vesh, përmes shkopinjve të pastrimit, shtyhet më thellë në kanal. Veshi prodhon dyllin si mekanizëm mbrojtës natyral në mënyrë që të mos depërtojnë brenda veshit dëmtues të ndryshëm, si bakteret viruset apo edhe insektet, të cilët do të mund të dëmtonin daullen.
Dylli i veshit gjithashtu përmban veti lubrifikuese e antibakteriale, të cilat e mbajnë të shëndetshëm kanalin. Shkopinjtë e pastrimit mund ta pengojnë këtë proces pasi mund ta shtyjnë dyllin më thellë në kanal duke krijuar bllokadë. Mund të shkaktojë parehati në vesh dhe në disa raste mund të shkaktojë humbje të përkohshme të dëgjimit.
Dëmtimi i lëkurës së brendshme të veshit
Otorinolaringologu Sanjay Saxhdeva, nga klinika “HearClear”, ka thënë se lëkura e kanalit të veshit është e hollë dhe lehtësisht mund të dëmtohet, sidomos nga shkopinjtë për pastrim, sepse ata mund ta gërvishtin.
Ky irritim i lëkurës së brendshme të veshit mund të qojë në inflamacion, i cili mund të shkaktojë dhimbje dhe gjakderdhje. Irritimi kronik i lëkurës së brendshme të veshit gjithashtu mund ta trashë atë, gjë që nuk e lejon dyllin të kalojë lehtësisht nëpër kanal për ta kryer funksionin e tij. Kjo gjë mund të shkaktojë humbje të dëgjimit.
Rritja e mundësisë për infeksione
Ka shanse që shkopinjtë e pastrimit të kenë baktere, gjë që rrit mundësinë për kontaminim të veshit. Kjo gjë mund të çojë në infeksione, të cilat mund të shkaktojnë dhimbje, inflamim, sekretim të veshit dhe humbje të dëgjimit. Në disa raste, infeksionet mund të dëmtojnë strukturën delikate të veshit të mesëm, gjë që potencialisht mund të çojë në humbje të dëgjimit.
Humbja e dëgjimit
Veshi i jashtëm është i ndarë nga ai i mesëm nga daullja e veshit. Shkopinjtë për pastrim mund ta dëmtojnë daullen në mënyrë aksidentale, nëse ndonjë shkop shtyhet me forcë shumë brenda kanalit për ta pastruar veshin.
Dëmtimi i daulles mund të shkaktojë humbje të dëgjimit, tinnitus (oshtimë të veshit) dhe marramendje. Ndërkohë që disa dëmtime të vogla mund të shërohen vet, dëmtimet e mëdha do të mund të krijonin mundësi për nënshtrim ndaj intervenimit.
