Pamjet që i pa para 25 vjetësh ende i ka të freskëta.
Ky ushtar britanik, së bashku me kolegët, u tronditen me atë se çfarë panë vetëm disa ditë pas çlirimit të Prishtinës.
Trupat paqeruajtëse britanike zbuluan dhoma torturash në disa objekte në Prishtinë.
“Kemi parë gjëra të tmerrshme brenda, njerëzit ishin torturuar aty në forma të ndryshme. Kur i zbuluam ato dhoma të torturave, menjëherë i kemi informuar të tjerët”, ka thënë veterani i ushtrisë britanike, Stephen Richards.
E njëra nga këto qendra torturash ishte pikërisht në këtë vend.
E dëshmitar i këtyre ngjarjeve të rënda ishte edhe Arsim Gërxhaliu. Ish-drejtori i Institutit të Mjekësisë Ligjore tregon se si erdhën deri tek zbulimi i këtyre qendrave.
“Banorët e Prishtinës të shqetësuar iu treguan ushtarëve britanikë që afër fakultetit juridik dhe ekonomik ka pasur lëvizje gjatë mbrëmjeve. Kishte dyshime se në këtë zonë ka pasur edhe varreza masive sepse gjatë mbrëmjes banorët kishin dëgjuar zhurmat e ekskavatorit” , tha Gërxhaliu.
Gërxhaliu tregon për momentin kur ka hyrë në këto dhoma dhe se çfarë ka parë në to.
“Në këto bodrume ka pasur shkopinj të hekurit, gomës dhe gjësende të tjera të forta. E mbaj mend se janë gjetur të brendshme te femrave dhe se muret ishin te mbuluara krejtësisht me gjak. Gjurmët e gjakut tregojnë se çfarë torturash çnjerëzore janë kryer në këto bodrume”.
Në këto dhoma të torturave në Prishtinë, ushtarët britanikë kishin gjetur thika, shkopinj gome dhe druri, shkopinj bejsbolli dhe drogë që ishte përdorur për qetësimin e viktimave./teve1.info/
