Të marten në Fakultetin Filozofik u promovua libri ‘’Beteja për 20 përqindëshin’’ e autorit Ardit Bido. Ky studim pasqyron identitetin etnik të jugut të Shqipërisë.
Zgjoi interesim të historianëve, profesorëve, autorëve e studentëve.
Prandaj salla e Fakultetit Filozofik, të martën u mbush plot.
Nga Kosova e Shqipëria u mblodhën në promovimin e librit ‘’Beteja e 20 përqindëshit’’, i cili pasqyron identitetin etnik të jugut të Shqipërisë.
Prandaj e gjithë vëmendja e pjesëmarrësve është në studimin e autorit Ardit Bido për debatin shqiptaro-grek.
Por cila është e veçanta e librit ‘’Beteja për 20 përqindëshin’’?
“Ai nuk është fryt i një nacionalizmi fanatik por i një fanatizmi të autorit për të vërtetën shkencore dhe kjo është një e veçantë e tij e cila e bën atë të patejkaluar për çështjen që parashtron dhe të vërtetat që i ndriçon”, tha Bedri Zyberaj – ish drejtor i agjencisë shtetërore të arkivave të Kosovës.
Ky libër thekson se pala greke pretendon se pjesa dërrmuese e ortodoksëve janë grekë, kurse pala shqiptare pretendon se numri i minoritarëve është i papërfillshëm.
Por çka e shtyri autorin Ardit Bidon të merret më këtë studim?
“Padyshim që jam i nxitur nga debati publik kur vjen fjala te Jugu i Shqipërisë, mbi Himarën dhe Konsipolin, sepse debati nuk përqendrohet atje ku është risku dhe padyshim që këtu ndikon dhe fakti që jam sarandit, ngase nuk e fsheh dot që në shtresat tona identitare është edhe ky element që më nxiti më shumë të hyja dhe të bëja një zbërthim të falsitetit që kemi ne në debatin publik. E treta që është më kryesorja që kthehet në debatin publik se atje s’ka asnjë grek, ose atje janë të gjithë grek, që vitet e fundit ka hyrë në Tiranë edhe ky koncept”, u shpreh Ardit Bido – autor.
Prandaj për gjendjen ndëretnike në trevat e bregdetit të jugut shqiptar, nga pjesëmarrësit u tha se duhet të punohet edhe më shumë.
“Bido në këtë libër tregon nëse ka pasur rritje artificiale të numrit të personave të vetëdeklaruar si grekë, e nëse po, sa dhe si kanë ndikuar në këtë aspekt politikat shtetërore të Greqisë apo grupet e veçanta të interesit”, tha profesori Bujar Dugolli.
