Publicisti Kim Mehmeti, i ftuar në emisionin “Këndi i Kimit” në Tëvë1, ka folur për skenarin e formimit të qeverisë së re dhe për mundësinë e një koalicioni ndërmjet partive opozitare dhe Lëvizjes Vetëvendosje, përfshirë Lidhjen Demokratike të Kosovës.
Mehmeti u shpreh skeptik për një marrëveshje të tillë, duke theksuar se legjitimiteti i deputetëve ekziston, por se atyre u mungon kredibiliteti për të vendosur në emër të qytetarëve.
“Unë nuk shoh një mundësi për një koalicion me partitë e tjera me LVV-në, mirëpo nuk është e pamundur. Unë e kam thënë pikësëpari se këta deputetë kanë legjitimitet, por nuk kanë më as kredibilitet për të zgjedhur qeverinë, sepse këta nuk mund të zgjedhin as ata që e kanë të parin e vet,” tha Mehmeti.
Duke komentuar zërat për një afrim të mundshëm mes LDK-së dhe LVV-së, ku LDK-ja votoj Nenad Rashiqit për postin e nënkryetarit të Kuvendit – një votim që ishte i rëndësishëm për Lëvizjen Vetëvendosje – si dhe zhvillimet e fundit në nivel lokal në Vushtrri, që janë interpretuar si sinjale bashkëpunimi mes këtyre dy partive.
Megjithatë, Mehmeti ngriti dyshime përse një qasje e tillë po ndodh vetëm tani dhe jo më herët, duke theksuar se Kosova ka humbur muaj të tërë pa qeveri funksionale.
“Këtu shtrohet ajo pyetja të cilën e kam thënë në gazetë: pse nuk e ndërprenë luftën para se të vriten 60 mijë veta? Edhe këtyre, një njeri i mençur duhet t’ua shtrojë pyetjen: pse nuk e bëtë këtë para tetë muajsh, por sot? Kush do t’ia kthejë Kosovës ato tetë muaj? Pse sot, pse jo kur e dërgoi letrën kryetari i Vetëvendosjes? Çka ndodhi e re sot që të pranohet?” u shpreh Mehmeti.
Ai përfundoi duke theksuar se në raste të tilla vendimet duhet të merren duke u konsultuar me popullin dhe jo vetëm brenda zyrave të partive politike.
“Në kësi situatash, duhet të merret vendimi i popullit. Sepse ju vendosni për atë popull,” tha ai.
