Lajmi kryesor në mediet më të mëdha botërore gjatë ditës së djeshme ishte njoftimi i presidentit Joe Biden se nuk do të garojë për tu rizgjedhur presidenti i SHBA-ve edhe për një mandat.
Për këtë vendim të Biden kanë reaguar edhe liderët e shteteve me të fuqishme në botë që zgjodhën fjalët më të mira për presidentin amerikan.
Ky lajm i preku edhe krerët shtetëror të Kosovës.
Presidentja e vendit, Vjosa Osmani, lartësoi figurën e Biden duke thënë se ai ka mbrojtur lirinë, pavarësinë dhe demokracinë e Kosovës.
“Nga ditët e tij si senator amerikan deri në mandatin e tij si zëvendëspresident dhe tani si President, Joe Biden gjithmonë ka mbrojtur lirinë, pavarësinë dhe demokracinë e Kosovës. Mirënjohja e popullit të Kosovës do të mbetet gjithmonë e thellë. I urojmë Presidentit Biden një vazhdim të suksesshëm të mandatit të tij dhe gjithë të mirat për të, për Jill Biden dhe familjen e tij në vitet në vijim”, u shpreh Osmani.
Ndërsa, kryeministri Kurti e cilësoi presidentin si një nga miqtë më të mëdhenj të Kosovës.
“Për dekada me radhë, Joe Biden ka qenë një nga miqtë më të mëdhenj dhe avokuesi më i palodhur i Kosovës. Njoftimi i presidentit Biden shënon fundin e një epoke. Bota dhe veçanërisht Kosova është një vend më i mirë dhe më i sigurt për shkak të kontributeve të tij të jashtëzakonshme. Për këtë, ne do të jemi gjithmonë mirënjohës”, ka shkruar Kurti.
Edhe Anëtari i Kryesisë së Lidhjes Demokratike të Kosovës, Muhamet Hamiti, thotë se Biden që nga vitet e 90-ta është përkushtuar shumë për Kosovën.
Biden ishte mbështetës i zëshëm i ndërhyrjes ushtarake të NATO-s kundër Serbisë për ta ndalur spastrimin etnik në Kosovë. Ai gjithashtu përkrahi fuqishëm pavarësinë Kosovës.
Lidhje me Kosovës Biden kishte edhe përmes djalit të tij, Beau Biden i cili ka shërbyer në Kosovë pas mbarimit të luftës, përkatësisht më 2001, në trajnimin e gjykatësve dhe prokurorëve vendorë.
Me 30 korrik të vitit 2021, Presidentja e Kosovës, Vjosa Osmani, ndau Medalje Presidenciale për Sundim të Ligjit për Beau Biden, djalit të ndjerë të presidentit amerikan, Joe Biden, i cili ka vdekur nga kanceri në tru më 2015.
E përmes një video-mesazhi, presidenti Biden, ka thënë se Kosova “është në zemrat e gjithë familjes Biden”.
