Presidenti nacionalist i entitetit të Republikës Sërpska, Milorad Dodik, po e sfidon drejtësinë në Bosnjë Hercegovinë.
Pavarësisht se është lëshuar një fletarrestim nga Gjykata në Bosnje, Dodik ka udhëtuar pa ndonjë problem për në Izrael ku do të marrë pjesë në një konferencë mbi antisemitizmin në Jerusalem.
Dodik para se të nisej për në Izrael ishte në Batajnicë, afër Beogradit, ku mori pjesë në ngjarje të organizuara për përvjetorin e bombardimeve të NATO-s mbi caqet serbe.
Por, rrethanat mbeten ende të paqarta se si atij iu mundësua ta kalonte kufirin për të shkuar në Serbi.
Disa detaje për lëvizjet e Dodik, i tregon për tëvë1 analisti nga Bosnja, Adi Cerimagiq.
“Për shkak të ndikimit të fuqishëm që ka brenda policisë kufitare, Milorad Dodik e kaloi kufirin për të shkuar në Serbi. Dyshimet janë se ai për në Izrael ka udhëtuar me një helikopter ushtarak të Serbisë ku supozohej të transportohej një person që ishte i sëmurë. Kur i sheh të gjitha këto veprime duket e qartë se Dodik gjatë gjithë kësaj kohe e ka pasur mbështetjen e Vuçiqit. Ai ka thënë se do të kthehet në Bosnje sepse mendon që institucionet e vendit nuk kanë fuqi të mjaftueshme për ta sjellë atë para drejtësisë”, thotë ai për Tëvë1.
Analist i lartë për Ballkanin Perëndimor në Iniciativën Evropiane për Stabilitet, Adi Cerimagiq, thotë se Bosnja Hercegovina po kalon nëpër një krizë të thellë politike.
Sipas tij situata e sigurisë mund të përkeqësohet për shkak liderit separatist serb, Milorad Dodik.
“Bosnja Hercegovina është duke e përjetuar një krizë të thellë politike për shkak të veprimeve të Milorad Dodik dhe mbështetësve të tij. Ata vazhdimisht po i shpërfillin vendimet e Gjykatës Kushtetuese dhe po synojnë t’i zbatojnë agjendat e tyre politike. Për shkak të këtyre zhvillimeve situata e sigurisë seriozisht rrezikon të përkeqësohet në Bosnje dhe Hercegovinë”, thotë Cerimagiq.
Presidenti, kryeministri dhe kryetari i Kuvendit të Republikës Sërpska, Milorad Dodik, Radovan Vishkoviq dhe Nenad Stevandiq, janë të dyshuar për sulm ndaj rendit kushtetues, dhe ndaj tyre është lëshuar një fletarrestim qendror.
