Një betejë e ashpër elektorale u zhvillua të dielën për postin e kryetarit të Prishtinës.
Edhe pse shihej si favorit, Përparim Rama arriti të sigurojë një fitore shumë të ngushtë ndaj kandidatit të Lëvizjes Vetëvendosje, Hajrulla Çeku.
Sipas rezultateve preliminare, Rama mori 46,935 vota, ndërsa Çeku 44,126 vota.
Ish-kandidati i PDK-së për kryetar të Prishtinës, Lirak Çelaj, vlerëson se fitorja e Ramës u ndikua kryesisht nga mungesa e bashkëpunimit të Vetëvendosjes me partitë e tjera.
“Hajrulla Çeku ishte një kandidat i fortë, por arsyeja pse ai nuk fitoi ka të bëjë me ngurtësinë e Lëvizjes Vetëvendosje për të bashkëpunuar me subjektet e tjera politike. Kjo u shndërrua më pas në një përparësi për z. Përparim Rama, i cili fitoi me një diferencë të vogël votash. Në fillim të garës kam menduar se diferenca do të ishte shumë më e madhe mes Ramës dhe Çekut”, ka vlerësuar Çelaj.
Ndërkaq, profesori në Universitetin “Adger” në Norvegji, Abit Hoxha, vlerëson se fitorja e Ramës në Prishtinë nuk ishte befasi, ndërsa thekson se votat e PDK-së e bënë diferencën në fund.
“Për mua rezultati nuk ka qenë befasi. E kam pritur fitoren e Ramës në këto zgjedhje. Befasia më e mirë ishte mënyra se si u zhvillua gara – me debat për projekte e plane për kryeqytetin. Mendoj se votuesit e PDK-së e kanë mbështetur më shumë Ramën në raundin e dytë”, shprehet Hoxha.
Sipas Hoxhës, fitorja në Prishtinë ka rëndësi të madhe politike dhe i hap rrugë kandidatit që t’ia mësyjë edhe nivelit nacional.
“Ka shumë rëndësi të fitosh Prishtinën, sepse është qyteti më strategjik në vend dhe përgatit kandidatin për kryeministër të ardhshëm. Kështu ka ndodhur edhe me Isa Mustafën në të kaluarën”, thotë ai.
Hajrulla Çeku përmes një postimi në rrjetin social Facebook, e ka uruar Përparim Ramën për fitoren dhe ka falënderuar përkrahësit e tij për mbështetjen gjatë fushatës.
