Nga Milazim Krasniqi
Vizioni i Vuçiqit për Serbinë deri në vitin 2025, thjesht është një utopi. Ai e nis nga realiteti, por për ta fshehur realitetin, sepse thotë kështu: “na e patën lënë vendin me ekonomi të shkatërruar, në të cilën drynat në fabrika ishin më të shpeshtë se sa njerëzit pranë makinave.”
Por Vuçiqi nuk tregon kush ua ka lënë në atë gjendje fabrikat. Nuk tregon se Serbia në vitet 1991-1999 ka zhvilluar katër luftëra agresive kundër fqinjve, për ç’arsye ka qenë nën saksione dhe është bombarduar nga NATO në vitin 1999. Nuk tregon se në regjimin e Millosheviqit e të Sheshelit, i cili i ka shkaktuar ato luftëra e ato shkatërrime, Vuçiqi ka qenë deputet dhe ministër.
Nga ana tjetër, në tekstin autorial për vizionin deri në vitin 2025, Vuçiqi nuk e thotë asnjë fjalë të vetme për integrimin e Serbinë në Bashkimin Evropian. Pra, Serbia do të bëhet edhe më rusofile edhe më putiniane. Vuçiqi nuk e ka përmendur as Ballkanin e Hapur, gjë që është tradhti ndaj Edi Ramës. Gjasat janë se Putini u ka hyrë në mes, siç u pati hyrtë në mes Stalini Titos e Enver Hoxhes. Teksti autorial i Vuçiqit ëhstë tallje me qytetarët serbë, sepse u tregon se çfarë ai ka dëshirë të ndodhë, duke ua fshehur realitetin e zymtë në të cilin ata jetojnë.
Mesazhi i Vuçiqit ma kujton mesazhin e famshëm të njërit nga udhëheqësit e dikurshëm të Serbisë, Nikolla Pashiqit: “Narode moj, stoka moja! (Populli im, gjaja (kafsha) ime!” Me bllokimin mental që kanë shumica në Serbi, ata e meritojnë Vuçiqin, sepse duken para tij ashtu si thuhet se ka thënë Pashiqi. (31 mars 2022)
