Vetëm 16% e gjermanëve do të ishin “pa dyshim” të gatshëm të mbronin vendin e tyre me armë në rast të një sulmi ushtarak, sipas një sondazhi të ri të publikuar të hënën.
Sondazhi, i realizuar nga Instituti Forsa, tregon një hezitim të gjerë mes qytetarëve gjermanë për t’u përfshirë në mbrojtjen ushtarake të vendit, pavarësisht paralajmërimeve të vazhdueshme nga udhëheqësit politikë dhe ushtarakë se Gjermania duhet të përgatitet për një konflikt të mundshëm të armatosur.
Sipas rezultateve, 59% e të anketuarve u shprehën se “ndoshta jo” ose “me siguri jo” nuk do të ishin të gatshëm të mbronin Gjermaninë në mënyrë aktive nëse ajo do të sulmohej.
Anadolu raporton se, kjo prirje është veçanërisht e theksuar tek gratë, ku 72% treguan mungesë gatishmërie për t’u përfshirë në mbrojtjen e vendit.
Nga ana tjetër, 16% thanë se do të ishin “padyshim” të gatshëm të luftonin, ndërsa 22% të tjerë deklaruan se “ndoshta” do ta bënin këtë, duke e çuar përqindjen e përgjithshme të atyre që mund të angazhohen në mbrojtje në 38%.
Sondazhi përfaqësues, i porositur nga grupi mediatik RedaktionsNetzwerk Deutschland, përfshiu rreth 1,000 qytetarë gjermanë dhe u zhvillua më 28 dhe 29 korrik.
Pas shpërthimit të luftës mes Rusisë dhe Ukrainës në vitin 2022, Gjermania ka shtuar ndjeshëm shpenzimet për mbrojtje, ndërkohë që shërbimet e saj të inteligjencës dhe forcat e armatosura kanë paralajmëruar vazhdimisht se një sulm i mundshëm nga Rusia ndaj një vendi anëtar të NATO-s mund të ndodhë brenda pesë viteve të ardhshme./teve1/
