Këtë ka konfirmuar për Tëvë 1, këshilltarja për media në Ministrinë e Arsimit, Edona Kutleshi-Maliqaj.
Kutleshi-Maliqaj theksoi se sa i përket numrit të nxënësve, kjo dallon nga shkolla në shkollë, teksa potencoi se ditët në vazhdim do informohen saktë edhe prindërit për kalendarin e ri shkollor.
“Inspektorati i Arsimit është duke i përpunuar të dhënat në lidhje me procesin mësimor të zhvilluar sot. Nga të dhënat e para të Inspektoratit rezulton se, një pjesë e madhe e mësimdhënësve në nivel vendi kanë qenë në vend të punës dhe e kanë zbatuar kalendarin shkollor. Sa i përket numrit të nxënësve, kjo varion nga shkolla në shkollë dhe nga komuna në komunë. Megjithatë, ditët në vijim do të punohet me Drejtoritë Komunale të Arsimit dhe shkollat për t’i informuar saktë edhe prindërit për kalendarin e ri shkollor”, tha ajo.
Tutje, ajo shtoi se edhe shkollat e kanë obligim që të evidentojnë në ditar nxënësit të cilët mungojnë.
Vendimi i marrë nga Ministria e Arsimit, që orët e humbura nga greva të zëvendësohen të shtuneve, po kundërshtohet nga SBASHK-u. Ndërkaq, ministrja e këtij dikasteri, Arbërie Nagavci ka bërë të ditur se mosmbajtja e orëve është vepër penale dhe ata mësimdhënës që nuk i zëvendësojnë nuk do të kompensohen. /Teve1.info/
