Seanca gjyqësore ndaj nënkryetarit të Listës Serbe, Slavko Simiq, dhe Urosh Vukasinoviq, të akuzuar për nxitje të dhunës ndaj gazetarëve gjatë protestave në Leposaviq më 16 qershor 2023, është shtyrë me kërkesë të mbrojtjes në Gjykatën Themelore në Mitrovicë.
Avokatët mbrojtës të të akuzuarve kërkuan shtyrjen e seancës, me arsyetimin se nuk i kanë pranuar të gjitha shkresat në gjuhën serbe, përfshirë edhe disa deklarata të të dëmtuarve.
Sipas prokurores së çështjes, palët ishin telefonuar për t’i tërhequr shkresat, por ato nuk janë paraqitur për t’i marrë.
Në mungesë të kushteve për vazhdimin e procesit, gjyqtarja Shqipe Sejdiu vendosi shtyrjen e seancës dhe urdhëroi Prokurorinë që të furnizojë palët me dokumentacionin përkatës në gjuhën e tyre.
Sipas aktakuzës së Prokurorisë Themelore në Mitrovicë, më 16 qershor 2023, gjatë një proteste kundër vizitës së ministrit të Administrimit të Pushtetit Lokal, Elbert Krasniqi, në Leposaviq, i akuzuari Slavko Simiq dyshohet se u ka dhënë urdhër protestuesve që të sulmonin ekipet mediatike shqiptare.
Pas urdhrave të supozuar, gazetarët janë sulmuar me shok-bomba, grushte, shqelma dhe mjete të forta.
Simiq ngarkohet me veprën penale “Pjesëmarrja në turmë që kryen vepër penale dhe huliganizëm”, ndërsa Urosh Vukasinoviq akuzohet edhe për sulm fizik ndaj gazetarëve.
Sipas statistikave të Asociacionit të Gazetarëve të Kosovës (AGK), gjatë protestave të serbëve në veriun e Kosovës në vitin 2023 janë regjistruar mbi 30 raste të sulmeve ndaj gazetarëve. Megjithatë, deri më tani, vetëm një person është dënuar.
Në shkurt të vitit 2025, Gjykata Themelore në Mitrovicë e dënoi me 12 mijë euro gjobë Dalibor Spasiqin, pasi ai e pranoi fajësinë për sulm ndaj gazetarit Burim Zariqi.
