Seanca për vrasjen e trefishtë në Gllogjan të Deçanit e cila ishte paraparë të mbahet sot është shtyrë.
Kështu bëri të ditur për teve1.info zëdhënësja e Gjykatës Themelore në Pejë, Tringa Zhuti, e cila bëri të ditur arsyen se pse është anuluar seanca.
“Seanca u anulua për shkak të mungesës së njërit prej anëtarëve të trupit gjykues, i cili ka munguar për arsye familjare”, tha Zhuti, derisa shtoi se nuk ka përgjigje nga ana e gjyqtares së rastit rreth mbajtjes së seancës së radhës.
Vrasja e trefishtë në Gllogjan ka ndodhur më 26 nëntor 2021, ku u patën vrarë tre persona, në mesin e tyre dy nxënës.
Sipas aktakuzës së ngritur më 5 maj 2023 nga Prokuroria Themelore në Pejë, të pandehurit Halil, Kastriot dhe Kreshnik Mehmetaj, ngarkohen se më 26 nëntor 2021, në fshatin Gllogjan, Komuna e Deçanit, saktësisht në rrugën “Ismajl Haradinaj”, të shtyrë nga hakmarrja e paskrupullt, në marrëveshje e bashkëveprim me njëri-tjetrin, privojnë nga jeta tre persona, dy prej tyre të cilët ishin fëmijë. Pra, të vdekur mbetën shoferi i autobusit G.Gj, si dhe nxënësit L.H (17 vjeçar) dhe G.M (17 vjeçare).
