Ngritja e çmimit për 16.1% pas vendimit të marrë nga Zyra e Rregullatorit të Energjisë, nuk do t’i prek serbët në katër komunat veriore.
Kjo pasi që në këtë pjesë të vendit vepron kompania serbe “Elektrosever” e cila furnizon me energji elektrike atë pjesë.
Ashtu siç kanë bërë të ditur nga ZRRE, “Elektrosever” e ka vetë në duar përcaktimin e tarifave.
E sipas kësaj qytetare serbe, ka ardhur koha që të paguhet çdo shpenzim i energjisë elektrike.
“Mendoj që mjaft kohë nuk kemi paguar. Mendoj që duhet të paguhet rryma. Keq që nuk është paguar deri tash. Ka humbur shumë shteti, gjithçka. Unë kështu mendoj. Së paku nga kjo pjesë. Nuk e di sa, por e di që duhet të paguhet. Mjaft më! Shumë është pritur, është tepruar. Nuk e di, unë mendoj që menjëherë të zgjidhet ky problem. Mjaft më! Sinqerisht, nëse duam, nga zemra”, ka thënë kjo qytetare.
Dikush thotë se kushtet si pensioner, ia pamundësojnë pagesën e faturave.
“Në nuk kam paguar, bir, e as tash nuk kam para. Kushedi çfarë do të bëhet?! Do të më ç’kyçin! Unë mbijetoj nga pensioni, kështu që do të më ç’kyçin! Nuk jam në gjendje të paguaj. Nga të paguaj?! Për pension duhet të shkoj në Rashkë, të humb tri ditë”, thotë qytetari i komunitetit serb.
E me vendimin e ZRRE-së nuk po pajtohen qytetarët shqiptarë.
Sipas Halil Dërgutit, nuk duhet të bëhet ndasi në vendimmarrje.
“E kemi parë një vendim shumë të gabuar me të vërtetë nuk duhet të bëjmë klasifikim të qytetarëve por ashtu qysh propozohet por ashtu qysh propozohet për jug të propozohet edhe për veri. Disa prej tyre janë bind që duhet me pagua” , thotë ai.
E në anën tjetër, sipas kryesuesit të Kuvendit të Mitrovicës së Veriut, Nexhat Ugljanin, kompania “Elektrosever” nuk po vepron ashtu siç ka premtuar.
“Faktikisht nuk e mbajnë fjalën qysh kanë premtua që do të kryhen dhe do të realizojnë programin si në tërë territorin e Kosovës kjo është një mënyrë e parregullsisë ndaj qytetarëve të tjerë të Republikës së Kosovës, këto duhet me qenë pa dallime”, thotë Ugljanin.
Akuza të ngjashme ndaj “Elektrosever” ka edhe Behxhet Shala nga KMDLNJ.
“Elektroseveri një organizatë fantome e cila nuk i përgjigjet institucioneve të Kosovës, as nuk ç’kyç serbët në veri, edhe pse atje pagesa e rrymës është simbolike askush nuk e din sa paguajnë si paguajnë, sikurse nuk e zbatojnë vendimin e ZRRE-së për rritjen e çmimit të energjisë elektrike për 16.1%”. Dmth shqiptarëve, jo serbëve ju rritet rryma, ndërkaq serbëve në veri jo”, thotë Shala.
Tëvë1 ka dërguar pyetje edhe në kompaninë “Elektrosever” nëse do të respektojnë vendimin e ZRRE-së, por të njëjtit nuk kanë kthyer përgjigje.
