Shtetet e Bashkuara do të vendosin sanksione ndaj zyrtarëve të Autoritetit Palestinez (AP) dhe anëtarëve të Organizatës për Çlirimin e Palestinës (OÇP), duke deklaruar se këto grupe po minojnë përpjekjet për paqe, thuhet në një deklaratë të Departamentit Amerikan të Shtetit.
Sipas deklaratës, masa ndalon personat e sanksionuar të marrin viza për të udhëtuar në SHBA, transmeton Al Jazeera.
“Është në interesin tonë të sigurisë kombëtare të vendosim pasoja dhe të mbajmë OÇP-në dhe AP-në përgjegjëse për mospërmbushjen e angazhimeve të tyre dhe për minimin e perspektivave për paqe”, thuhet në deklaratë.
Kjo lëvizje vjen pasi Uashingtoni mbylli Zyrën për Çështjet Palestineze në mars, një veprim që kritikët e kanë përshkruar si përpjekje për të shmangur angazhimin e zyrtarëve palestinezë me SHBA-të.
Po ashtu, në shkurt SHBA ndërpreu financimin për forcat e sigurisë së Autoritetit Palestinez.
