Vendimi i qeverisë për shtesat prej 50 eurosh në pagë vetëm për punëtorët e sektorit publik edhe për muajin janar, nuk u mirëprit nga qytetarët të cilët punojnë në sektorin privat.
Sherif Ibishi, shprehet i zhgënjyer nga ky vendim.
“Edhe unë jam në privat neve kerkush as firma as kerkush as shteti, cka me bo ski ku ankohesh”, tha qytetari Sherif Ibishi.
Ndërkaq qytetarë tjerë e cilësojnë si diskriminim vendimin e ekzekutivit kosovar.
“Qytetarët janë të njëjtë si në sektor privat dhe në atë public duhet barabartë të shkojë nuk ka arsyetim ndarja, kjo është diskriminim dhe këtë nuk duhej ta lejonte qeveria”, deklaroi Nait Hasani.
“Mendoj se nuk është në rregull sepse sikur ai privat dhe publik mendoj që është desht me kon njëjtë, mendoj se gjithmonë sektori privat po diskriminohet”, theksoi qytetari Sebi Çavdarbasha.
“Normal duhet në të dy anët dhe në publik dhe atë privat”, u shpreh qytetari tjetër Valon Sadriu.
“Konsideroj që nuk është desht me bo dallime, gjithë me qenë njëjtë sepse edhe ata jane pjesë e shoqërisë, po me duket diskriminim… Edhe pse vet i takoj sektorit publik, por mendoj se edhe ata të sektorit privat është dashur të kenë të njëjtin privilegj”, tha Selman Babaj.
E ekonomisti Jakup Bellaqa tregon arsyet pse sektori privat duhej të përfitonte nga kjo shtesë.
“Për sektorin publik kjo është e mirëseardhur edhe pse kosto e jetesës është më e lartë, por kish qenë mirë edhe në sektorin privat sepse ky sector është gjeneratori i të hyrave dhe buxhetit të Kosovës, me mbështetjen e sektorit privat të Kosovës kish stimulu dhe konsumin, ndërkohë kur rritet konsumi ishte rrit kërkesa dhe fuqia blerëse”, bëri të ditur Bellaqa.
Vendimi për 50 eurot shtesë për sektorin publik u morë në mbledhjen e së mërkurës të qeverisë.
Kronika e realizuar nga gazetarja Lendrina Kodrolli.
