Janë dyert e shtëpisë së vjetër në Shalë të Lipjanit.
Ani pse nuk jeton më në të, kujtimet më të veçanta Ali Mejzinolli i ka brenda këtyre mureve.
E të veçantë ishin edhe mysafirët, që i priti në fillimin e shkurtit të vitit ’99-të.
Ishin këta delegacioni nga Shtabi i Përgjithshëm i Ushtrisë Çlirimtare të Kosovës.
Këta të fundit nga këtu do të merrnin rrugën drejt Rambujesë së Francës.
“Pjesën e parë, ka ardhur Ramë Buja i pari, Jakup Krasniqi, Azem Syla, Hashim Thaçi ka qenë i fundit që ka ardhur prej terrenit. Vetëm ka hy brenda dhe ka dalë për më shkua për Rambuje. Sigurimi amerikan me ka lejuar vetëm mua brenda, të tjerët jo. Kjo për shkak se unë isha pronari i shtëpisë”, tha Ali Mejzinolli, pronar i shtëpisë.
Mejzinolli thotë se delegacioni i UÇK-së, erdhi me rroba ushtarake.
Por, për Rambuje duhej nisur me rroba civile, të cilat nuk i patën me vete.
“Kanë ardhur të veshur me tesha të UÇK-së, këtu janë ndërruar në katin e dytë. Katundi i ka siguruar rrobat më të mira civile për ta. Shembull, Ramë Buja i ka marrë teshat e mia”, tregon pronari i shtëpisë.
60 vjecari tregon sa optimist ishte delegacioni kosovar për udhëtimin në Francë.
“Sipas bisedave të tyre këtu, kanë qenë shumë optimist. Kanë biseduar vetëm për Rambujenë dhe fatin e Kosovës”, shprehet Mejzinolli, për Tëvë1.
Por, as pas 26 viteve, nuk i ka harruar fjalët që ia tha dikush nga ndërkombëtarët.
“Pjesën e dytë kur kanë ardhur, një gazetar amerikan me nxori jashtë, më tha a mundem më të pyet diçka? I thashë po. Tha a ke ndikim tek Hashim Thaçi, se pjesë e dytë e Rambujesë është për fatin e Kosovës dhe duhet me pranua ofertën e dytë? I thashë, unë jam pronari i shtëpisë, ama nuk kam ndikim tek Thaçi”, tregon ai.
Marrëveshja u hartua nga NATO, ndërsa si vend për bisedime u zgjodh Kalaja e Rambujesë në Francë.
Këtë marrëveshje e refuzoi pala serbe, gjë që hapi rrugët për ndërhyrjen e NATO-së në Luftën e Kosovës.
