E gjitha u bë shkrumb e hi.
Kjo pasi mesditën e së enjtes, një shtëpi në Malishevë u përfshi nga zjarri.
Detajet se si ndodhi rasti i tregoi për televizionin kryefamiljari i shtëpisë, Sadik Mazreku.
“O babe, shtëpia është tu na kale, se djalin e kam pas aty ngat tu punu, se ai punon tjetërk. Unë në lokal. E kena nga ai me një kerr tjetër unë e kom thirr një shokë e I thash o nga se kerrin e kasha të prishur e I thash se diçka te shpija është tu u kall edhe jena ardh. Kur jena ardh këtu kanë qenë dy kojshi, djali I axhit dhe baba. Në atë si jam ardh unë janë ardh me ndihm të shpejt, me zjarrfiksat me krejt jonë ardh”, tha Mazreku.
Ai thotë se dëmet janë afër 50 mijë euro.
Derisa dyshimet për këtë zjarr, Mazreku i lidh me problemet e vazhdueshme që kanë me tensionin e energjisë elektrike.
“Mu mendja po ma merr që është prej tensionit të rrymës. Me rrymë këto ditë ka shumë problem, përditë pa u nal një herë në ditë ose dy tre herë në ditë është e pa mundshme”, tregoi Mazreku.
Për këto dyshime, nuk patën një përgjigje nga KEDS-i.
Sipas zëdhënësit të këtij institucioni, pas te gjeturave, do të dalin me një raport.
“Me të pranuar informatën për rastin në fjalë, i cili ka ndodhur dje, ekipi përkatës i KEDS-it ka dalë në vendin e ngjarjes për të verifikuar gjendjen. Me të shqyrtuar të gjeturat, komisioni përkatës, i cili formohet për raste të tilla, do të dalë me një raport përfundimtar”, tha zëdhënësi i KEDS-it, Lulzim Krasniqi.
Me gjithë dëmet që u janë shkaktuar, kësaj familje u dolën në ndihmë Shtabi Emergjent i Komunës së Malishevës.
“Në lidhje me rastin në fjalë, dëmet janë të konsiderushme. Për momentin shtëpia është e pabanushme. Palës i janë ofruar nga ana e Shtabit e Nivelit Komunal, ato ndihmat ligjore, si në për strehim, ndihma me pako ushqimore dhe gjëra të tjera” , tregoi koordinatori i Shtabit Emergjent Komunal të Malishevës, Halit Mazreku.
Me rastin po merren edhe Policia, të cilët thanë për tëvë1 se i njëjti po trajtohet si “Zjarrvënie”.
Kronikë e realizuar nga gazetarja – Adea Mustafaj
