Shtëpia e Bardhë ka thënë të martën se “ushtria amerikane është gjithmonë një opsion”, edhe pse një sërë udhëheqësish evropianë hodhën poshtë komentet e Presidentit amerikan, Donald Trump në lidhje me përpjekjen amerikane për të marrë nën kontroll ishullin më të madh në botë.
Trump ka hedhur idenë e blerjes së Grenlandës, e cila është pjesë e mbretërisë së Danimarkës, që nga mandati i tij i parë. Por, pas veprimit ushtarak amerikan në Venezuelë këtë fundjavë , ai ka ripërtërirë thirrjet që SHBA-të të marrin përsipër Grenlandën, duke përmendur arsye strategjike.
“Presidenti Trump e ka bërë të ditur mirë se blerja e Grenlandës është një përparësi e sigurisë kombëtare të Shteteve të Bashkuara dhe është jetike për të penguar kundërshtarët tanë në rajonin e Arktikut”, tha sekretarja e shtypit e Shtëpisë së Bardhë, Karoline Leavitt, në një deklaratë.
“Presidenti dhe ekipi i tij po diskutojnë një sërë opsionesh për të ndjekur këtë qëllim të rëndësishëm të politikës së jashtme dhe sigurisht, përdorimi i ushtrisë amerikane është gjithmonë një opsion në dispozicion të komandantit të përgjithshëm.”
Komentet e Leavitt pasuan gjithashtu udhëheqësit e Francës, Gjermanisë, Italisë, Polonisë, Spanjës dhe Mbretërisë së Bashkuar që iu bashkuan kryeministres daneze Mette Frederiksen në lëshimin e një deklarate duke riafirmuar se ishulli strategjik dhe i pasur me minerale Arktik “i përket popullit të tij”.
Deklarata e tyre mbrojti sovranitetin e Grenlandës, e cila është një territor vetëqeverisës i Danimarkës dhe kështu pjesë e aleancës ushtarake të NATO-s.
