Shtëpia e Bardhë shprehu kundërshtimin e saj të martën ndaj një propozimi në një samit të liderëve arabë për rindërtimin e Gazës, duke argumentuar se ai nuk trajton “realitetin” aktual në enklavën e shkatërruar nga lufta.
“Propozimi aktual nuk adreson realitetin se Gaza është aktualisht e pabanueshme dhe banorët nuk mund të jetojnë në mënyrë njerëzore në një territor të mbuluar me mbeturina dhe mjete të pashpërthyera,” tha zëdhënësi i Këshillit të Sigurisë Kombëtare Brian Hughes në një deklaratë të dërguar me email për Anadolu.
“Presidenti Trump i qëndron vizionit të tij për të rindërtuar Gazën të lirë nga Hamasi. Ne presim bisedime të mëtejshme për të sjellë paqe dhe prosperitet në rajon”, shtoi ai.
Udhëheqësit arabë në samitin e mbajtur të martën, që erdhi si përgjgije ndaj planit të Trumpit për të “marrë” Gazën, ranë dakord njëzëri për një plan pesëvjeçar prej 53 miliardë dollarësh për të rindërtuar Gazën pa zhvendosur palestinezët, për të kundërshtuar propozimin e presidentit amerikan Donald Trump për të “marrë nën kontroll” enklavën bregdetare.
Samiti theksoi se ai caktoi një komitet ligjor arab për të studiuar klasifikimin e zhvendosjes palestineze si pjesë e krimit të gjenocidit.
Edhe Izraeli, i cili po mban një bllokadë për të gjitha ushqimet, ilaçet dhe ndihmat në Gaza ka kundërshtuar propozimin e liderëve arabë.
Kurse, Hamasi ka thënë se e vlerëson propozimin e udhëhequr nga Egjipti dhe mirëpret thirrjet për të mbajtur zgjedhje legjislative dhe presidenciale sa më shpejt të jetë e mundur.
Ministria e Shëndetësisë e Gazës ka konfirmuar 48,388 të vdekur palestinezë në luftën e Izraelit në Gaza, ndërsa 111,803 njerëz janë plagosur. Zyra e Qeverisë për Media përditësoi numrin e saj të vdekjeve në të paktën 61,709, duke thënë se mijëra palestinezë të zhdukur nën rrënoja supozohen të vdekur.
