Shtëpia e Bardhë ka hedhur poshtë një raport të një misioni të pavarur faktmbledhës të Kombet e Bashkuara, i cili tha se ka dyshime të arsyeshme për të besuar se Shtetet e Bashkuara kanë kryer krime lufte gjatë dy sulmeve ajrore në Iran.
Misioni i Pavarur Ndërkombëtar Faktmbledhës për Iranin tha në një raport të publikuar më 17 shtator se ka dyshime të arsyeshme për të besuar se forcat amerikane kishin kryer krim lufte gjatë sulmeve ndaj një shkolle në Minab dhe ndaj një objekti sportiv në Lamerd më 28 shkurt.
Sipas misionit, në dy sulmet u vranë të paktën 178 civilë, përfshirë gra dhe fëmijë. Sulmi në Minab goditi Shkollën Fillore Shajareh Tayyebeh dhe vrau më shumë se 150 persona, përfshirë rreth 120 nxënës.
Një sulm i ndarë ndaj një kompleksi sportiv dhe zonës së banuar përreth në Lamerd vrau 22 civilë.
Në një përgjigje të ashpër me shkrim ndaj raportit, zëdhënësja e Shtëpisë së Bardhë, Anna Kelly, i hodhi poshtë gjetjet.
“E vetmja palë në këtë konflikt që ka kryer krime lufte është regjimi iranian, i cili ka vrarë mijëra njerëz të vet, ka vrarë amerikanë jashtë vendit, ka kryer akte terrorizmi në Ngushticën e Hormuzit dhe ka kryer sulme pa dallim ndaj fqinjëve të tij në rajon”, tha ajo.
Kelly tha po ashtu se Këshilli i OKB-së për të Drejtat e Njeriut “nuk ka bërë asgjë për të drejtat e njeriut, teksa për dekada ka thënë broçkulla joserioze”.
Zyrtarët amerikanë kanë thënë vazhdimisht se operacionet ushtarake kryhen në përputhje me ligjin për konflikt të armatosur dhe se po zhvillohet një hetim.
SHBA-ja dhe Izraeli nisën sulmet ajrore ndaj Republikës Islamike në fund të shkurtit dhe Irani u kundërpërgjigj duke kryer sulme në mbarë rajonin e Lindjes së Mesme.
Raporti pritet t’i prezantohet zyrtarisht Këshillit të OKB-së për të Drejtat e Njeriut, që ka 47 anëtarë, në Gjenevë më 21 shtator.
Misioni po ashtu tha se ka dyshime të arsyeshme për të besuar se autoritetet iraniane kryen krime kundër njerëzimit gjatë shtypjes së protestave mbarëkombëtare në dhjetor 2025 dhe janar 2026.
Ai përmendi vrasje të paligjshme, ndalime arbitrare, torturë dhe akte të tjera çnjerëzore të kryera si pjesë e një sulmi të gjerë dhe sistematik ndaj civilëve./REL
