Dallaveret me tenderë janë bërë cak i Prokurorisë Themelore në Prizren.
Në mesin e tyre, është një kontratë në vlerë të 550 mijë eurove, për renovimin dhe mirëmbajtjen e objekteve komunale të Komunës së Prizrenit.
Për këtë çështje, Prokuroria e Prizrenit ka ngritur aktakuzë ndaj shtatë zyrtarëve komunal, të cilët po akuzohen për kurdisje të tenderit.
Ata, sipas aktakuzës, favorizuan një operator ekonomik, ani pse oferta e tij ishte rreth 203 për qind më e shtrenjtë sesa e dy operatorëve të tjerë në garë.
Këta zyrtarë, dyshohet se manipuluan me çmimet gjatë fazës ofertuese, duke i shkaktuar dobi pasurore njërit operator ekonomik.
“Të pandehurit, veprojnë në kundërshtim me Ligjin për Prokurorim Publik dhe në kundërshtim me Rregullat dhe Udhëzuesin e Prokurimit Publik, në atë mënyrë që i akuzuari Xh.D., në cilësinë e kryetarit të komisionit vlerësues, Y.G., dhe Q.K., anëtarë të komisionit, i rekomandojnë autoritetit kontraktues Komunës së Prizrenit, lidhjen e kontratës në vlerë 550.000,00 €, me grupin e operatorit të lartpërmendur, përkundër faktit që pesë operatorë të përgjegjshëm që nuk janë rekomanduar nga komisioni vlerësues, kanë qenë më të lirë rreth 203.47% përkatësisht 202.771.98 € sipas çmimeve mesatare të realizuar për tetë situacione deri më datë 05.08.2024”, thuhet nga Prokuroria.
Grupi i operatorëve ekonomik të cilët u favorizuan janë “P.C.G. Sh.P.K.” dhe “A-T. Sh.P.K”
Televizioni ka provuar gjatë gjithë ditës të marrë një qëndrim nga komuna e Prizrenit, mirëpo ata nuk janë përgjigjur.
Për zyrtarët komunalë rëndojnë akuzat për “Keqpërdorim të detyrës zyrtare”.
Për opozitën në Prizren, aktakuza e ngritur nuk përbën ndonjë befasi.
“Është shqetësuese por aspak befasuese për neve. Ngase të gjithë qytetarët e Prizrenit, në këtë rast edhe ne si opozitë e dijmë fare mirë se këtu në Prizren nuk ka llogaridhënie dhe bëhet manipulimi në shumë tender. Ku nuk ndiqen procedurat e rregullta ligjore që operatori ekonomik, i cili i plotëson kriteret dhe kushtet, por favorizohet kompanitë të cilat janë të afërta me pushtetin”, thotë Karanfil Haxhillari nga Lëvizja Vetëvendosje.
Prokuroria Themelore e Prizrenit ngriti një aktakuzë të ngjashme për keqpërdorim të detyrës zyrtare, edhe para rreth dy javësh.
Rasti kishte të bënte me kontrollimin e punëve ndërtimore për ndërtimin e një shkolle në fshatin Tërnje të Suharekës.
Shtatë zyrtarë përfunduan si të akuzuar, për shkak se i shkaktuan dëm komunës së Suharekës në vlerë të 29 mijë e 202 eurove.
